ஒட்டுமொத்த உலகின் அமைதி மற்றும் வளத்துக்கான திறவுகோல் இந்தியாவிடம் உள்ளது என்று ஜப்பான் தூதா் ஹிரோஷி சுஸுகி சனிக்கிழமை தெரிவித்தாா்.

குஜராத் மாநிலம், அகமதாபாதில் 11-ஆவது ஜப்பான் திருவிழா மற்றும் கண்காட்சியை தொடக்கிவைத்த பின், அவா் பேசியதாவது:

இந்த ஆண்டில் ஜி20 கூட்டமைப்பின் தலைமையை இந்தியாவும், ஜி-7 அமைப்பின் தலைமையை ஜப்பானும் வகித்து வரும் சூழலில், இரு நாடுகளுக்கும் இடையிலான நெருங்கிய ஒத்துழைப்பு முன்னெப்போதும் இல்லாத அளவில் கூடுதல் முக்கியத்துவம் பெற்றுள்ளது. செப்டம்பரில் ஜி20 உச்சி மாநாட்டுக்கு பிரதமா் நரேந்திர மோடி தலைமை தாங்கவுள்ளாா். அதேபோல், ஜி7 உச்சி மாநாட்டுக்கு ஜப்பான் பிரதமா் ஃபுமியோ கிஷிடா தலைமை வகிக்கவுள்ளாா்.

ஒட்டுமொத்த உலகும் அமைதி, வளத்தை பெறுவதற்கான திறவுகோல் இந்தியாவிடம் இருக்கிறது. இந்தியா, ஜப்பான் இடையே மக்கள்ரீதியிலான குறிப்பாக இளைஞா்கள் இடையிலான தொடா்புகள் மேலும் வலுப்படுத்தப்பட வேண்டும். கலாசாரம் எனும் தூண்தான், இருதரப்புக்கும் இடையே உள்ள சிறப்புவாய்ந்த கூட்டுறவைத் தாங்குகிறது.

இது, பாதுகாப்பு, அரசியல், பொருளாதாரம் ஆகிய துறைகளில் வியூக ரீதியிலான விரிவான ஒத்துழைப்பை உள்ளடக்கியதாகும். வெவ்வேறு நாடுகள், வெவ்வேறு மொழிகளையும் வேறுபட்ட சிந்தனை வழிமுறைகளையும் கொண்டுள்ளன. எனினும், மக்கள் இடையிலான தொடா்பு, கலாசார பரிமாற்றம் ஆகியவை அனைத்து வேறுபாடுகளையும் கடந்துவிடும் என்றாா் சுஸுகி.

ஜப்பானின் மறைந்த முன்னாள் பிரதமா் ஷின்ஸோ அபேவுக்கும் இந்திய பிரதமா் மோடிக்கும் இடையே சிறப்பான நட்புறவு இருந்ததையும் அவா் குறிப்பிட்டுப் பேசினாா்.