உலகம்

விண்கல்லை துல்லியமாக தாக்கிய நாசாவின் ‘டார்ட்’: இனி பூமியை நெருங்க முடியாது!

27th Sep 2022 11:09 AM

ADVERTISEMENT

விண்கல்லை துல்லியமாக தாக்கும் நாசாவின் முயற்சி இன்று வெற்றி பெற்றுள்ளது.

சுமார் 6.6 கோடி ஆண்டுகளுக்கு முன்பு பூமியில் விழுந்த விண்கற்களால் அன்றைய டைனோசர் இனம் அழிந்து, மலைகள் வெடித்து சிதறியதுடன், சுனாமி போன்ற பேரழிவுகளை பூமி சந்தித்தது.

தற்போது பூமிக்கு உடனடியாக எந்த விண்கல்லினாலும் ஆபத்து இல்லை என்றாலும், எதிா்காலத்தில் அத்தகைய அபாயம் ஏற்படும் நிலையில், அந்தக் கற்களிலிருந்து பூமியைக் காப்பதற்கான ஆய்வுகள் மேற்கொள்ளப்பட்டு வருகின்றன.

இந்தப் பின்னணியில் ஏற்கெனவே பல திரைப்படங்கள் வெளியாகியிருந்தாலும், தற்போது அத்தகைய முயற்சியை சோதனை முறையில் நாசா மேற்கொண்டுள்ளது.

ADVERTISEMENT

அதற்காக, விண்கல் ஒன்றின் மீது வேண்டுமென்றே மோதி அதன் சுற்றுவட்டப் பாதையை மாற்றுவதற்காக ‘டார்ட்’ என்ற செயற்கைக்கோள் ஒன்றை ஸ்பேஸ் எக்ஸ் நிறுவனத்தின் பல்கான் 9 ராக்கெட் மூலம் கடந்த நவம்பர் மாதம் விண்ணில் ஏவயது நாசா.

இந்த ‘டார்ட்’ செயற்கைகோளானது பூமியிலிருந்து சுமார் 63 லட்சம் மைல்கள் தொலைவில் உள்ள 2,500 அடி விட்டம் கொண்ட ‘டிடிமாஸ்’ என்ற விண்கல்லைச் சுற்றி வரும் ‘டிமாா்ஃபாஸ்’ என்ற குட்டி நிலவு விண்கல்லைக் குறிவைத்து செலுத்தப்பட்டது.

டிமாா்ஃபாஸ்(படம்: நாசா)

நாசாவின் திட்டத்தின்படி, ராக்கெட்டிலிருந்து பிரிந்த ‘டார்ட்’ செயற்கைகோள் சரியான பாதையில் பயணம் செய்து டிமாா்ஃபாஸ் விண்கல்லின் மையப்பகுதியை இன்று அதிகாலை துல்லியமாக தாக்கியுள்ளது.

இதன்மூலம், ‘டார்ட்’ திட்டத்தின் முதல்கட்டம் வெற்றியடைந்துள்ளது. மேலும், ஒருசில நாள்களில் டிமாா்ஃபாஸ் விண்கல் தனது பாதையை மாற்றுமா என்பது தெரியவரும்.

இதையும் படிக்க | 2023-ல் இந்தியாவில் 10.4% ஊதியம் உயர வாய்ப்பு!

டிமாா்ஃபாஸ் விண்கல் தனது பாதையை மாற்றும் பட்சத்தில், வரும் காலங்களில் டார்ட் விண்கலம் மூலம் பூமியை நோக்கி வரும் விண்கல்லை விண்ணிலேயே துல்லியமாக தாக்கி அதன் பாதையை மாற்ற முடியும் என்று நாசா விஞ்ஞானிகள் தெரிவித்துள்ளனர்.

 

 

ADVERTISEMENT
ADVERTISEMENT