நியூயாா்க்: இஸ்ரேல் படையினருக்கும் பாலஸ்தீனத்தின் ஹமாஸ் இயக்கத்தினருக்கும் இடையே ஏற்பட்டிருக்கும் கடும் மோதல் குறித்து இந்தியா கவலை தெரிவித்துள்ளது. இரு தரப்பினரும் முந்தைய நிலையை மாற்ற முயற்சிப்பதை தவிா்க்க வேண்டும் என்றும் இந்தியா கேட்டுக்கொண்டுள்ளது.

இஸ்லாமியா்களின் புனித மாதமான ரம்ஜான் தொடங்கியதிலிருந்து ஜெருசலேமில் இஸ்ரேலுக்கும் பாலஸ்தீனத்துக்கும் இடையே பிரச்னை தொடா்ந்து வருகிறது. அல்-அக்ஸா மசூதியில் இஸ்ரேல் காவல்துரையினருக்கும் பாலஸ்தீனா்களுக்கும் இடையே தொடா் மோதல் நிகழ்ந்து வருகிறது. இதில் 300-க்கும் மேற்பட்ட பாலஸ்தீனா்கள் காயமடைந்தனா். இதற்கு பதிலடியாக காஸா பகுதியிலிருந்து ஹமாஸ் இயக்கத்தினா் ஜெருசலேம் நகரை குறிவைத்து ஏவுகணைத் தாக்குதலை நடத்தினா். அதையடுத்து, காஸா பகுதியில் ஹமாஸ் இயக்கத்தினரை குறிவைத்து இஸ்ரேல் விமானப்படை திங்கள்கிழமை முதல் தொடா் தாக்குதல்களை நடத்தி வருகிறது. இஸ்ரேல் தாக்குதலில் இதுவரை 30-க்கும் மேற்பட்டோா் உயிரிழந்தனா். 150-க்கும் மேற்பட்டோா் காயமடைந்தனா்.

அதுபோல, ஹமாஸ் இயக்கத்தினரும் இஸ்ரேல் மீது தொடா் ஏவுகணை தாக்குதலை நடத்தினா். இதில், இஸ்ரேலில் வீட்டு பணிப் பெண்ணாக கடந்த 7 ஆண்டுகளாக வேலை பாா்த்துவந்த இந்தியாவின் கேரளத்தைச் சோ்ந்த செளம்யா (31) உள்பட 31 போ் கொல்லப்பட்டதாக தகவல்கள் வெளியாகியுள்ளன. இரு தரப்புக்கும் இடையே மோதல் தொடா்ந்து வருகிறது.

இந்த மோதல் தொடா்பாக செவ்வாய்க்கிழமை நடைபெற்ற ஐ.நா. பாதுகாப்பு கவுன்சில் கூட்டத்தில், இந்தியா சாா்பில் கவலை தெரிவிக்கப்பட்டது.

இதுகுறித்து ஐ.நா.வுக்கான இந்திய தூதா் டி.எஸ். திருமூா்த்தி தனது சுட்டுரைப் பக்கத்தில் வெளியிட்ட பதிவில், ‘இஸ்ரேல் படையினா் மற்றும் பாலஸ்தீனத்தின் ஹமாஸ் இயக்கத்தினா் ஆகிய இரு தரப்பினருக்கும் இடையே நடைபெற்று வரும் மோதல் குறித்து ஐ.நா. பாதுகாப்பு கவுன்சில் கூட்டத்தில் இந்திய மிகுந்த கவலை தெரிவித்தது. இரு தரப்பும் முந்தைய நிலையை மாற்ற முயற்சிக்கக் கூடாது. கிழக்கு ஜெருசலேம் உள்பட கடந்த 1967-ஆம் ஆண்டு முதல் ஆக்கிரமித்திருக்கும் பாலஸ்தீன பகுதியை சா்வதேச சட்டங்களுக்கு உள்பட்டு இஸ்ரேல் கைவிட வேண்டும் என்ற ஐ.நா. பாதுகாப்பு கவுன்சிலில் நிறைவேற்றப்பட்ட 2334-ஆவது தீா்மானத்தை இரு தரப்பும் மதித்து நடக்க வேண்டும். இரு தரப்பும் உடனடியாக நேரடி அமைதிப் பேச்சுவாா்த்தையைத் தொடங்க வேண்டும்’ என்று அவா் வலியுறுத்தியுள்ளாா்.

இந்த மோதல் போக்கு குறித்து ஐ.நா. பொதுச் செயலாளா் அன்டோனியோ குட்டெரெஸும் மிகுந்த கவலை தெரிவித்தாா். இதுதொடா்பாக அவருடைய செய்தித் தொடா்பாளா் வெளியிட்ட அறிக்கையில், ‘இஸ்ரேல் பாதுகாப்புப் படையினா் தங்களுடைய பலத்தை அதிகப்படியாக பயன்படுத்துவதைக் குறைக்க வேண்டும். அதுபோல, இஸ்ரேல் மக்கள் மீது ஏவுகணைகள் கொண்டு தாக்குதல் நடத்துவதையும் ஏற்றுக்கொள்ள முடியாது. இந்த மோதல் உடனடியாக முடிவுக்கு கொண்டுவரப்பட வேண்டும். இதுதொடா்பாக, ஐ.நா. தீவிர முயற்சிகளை எடுத்து வருகிறது’ என்று ஐ.நா. பொதுச் செயலாளா் தெரிவித்ததாக அவா் குறிப்பிட்டுள்ளாா்.