இந்தியாவின் எண்ம பணப் பரிவா்த்தனை வளா்ச்சி கடந்த செப்டம்பா் இறுதியில் உச்சத்தைத் தொட்டுள்ளதாக மத்திய ரிசா்வ் வங்கியின் குறியீட்டு அளவீடுகள் தெரிவிக்கின்றன.

ரிசா்வ் வங்கி புதிதாக உருவாக்கியுள்ள எண்ம பணப் பரிவா்த்தனை குறியீட்டு எண் (ஆா்பிஐ-டிபிஐ) கடந்த 2022-ஆம் ஆண்டு செப்டம்பா் மாதத்தில் 377.46-ஆக வளா்ச்சியடைந்துள்ளது. இது, இதுவரை இல்லாத அதிகபட்ச வளா்ச்சியாகும். அதற்கு முந்தைய 2021-ஆம் ஆண்டின் அதே மாதத்தில் ஆா்பிஐ-டிபிஐ 304.06-ஆக இருந்தது.

இணைய வழியில் மேற்கொள்ளப்படும் பணப் பரிவா்த்தனைகள் தொடா்பான 5 அம்சங்களை அடிப்படையாகக் கொண்டு, ஆா்பிஐ-டிபிஐ குறியீட்டு எண்ணை உருவாக்குவதாக ரிசா்வ் வங்கி கடந்த 2018-ஆம் ஆண்டு மாா்ச் மாதத்தில் அறிவித்தது.

எண்ம பணப் பரிவா்த்தனைகளை மேற்கொள்வதற்கான வசதிகள், அதற்கான தேவை சாா்பு கட்டமைப்பு, அளிப்பு சாா்பு கட்டமைப்பு, பரிவா்த்தனை செயல்திறன், வாடிக்கையாளா்களை மையப்படுத்தியிருத்தல் ஆகிய 5 அம்சங்களின் அடிப்படையில் இந்தக் குறியீட்டு எண் நிா்ணயிக்கப்படுகிறது.

கடந்த 2021-ஆம் ஆண்டு மாா்ச் மாதம் முதல் 6 மாதங்களுக்கு ஒருமுறை இந்தக் குறியீட்டு எண் அறிவிக்கப்படுகிறது.