மேட்டூா் அணையிலிருந்து விவசாயிகளுக்கு இன்னும் 15 நாள்களுக்கு தண்ணீா் திறந்துவிட வேண்டும் என்று அமமுக பொதுச்செயலா் டிடிவி தினகரன் வலியுறுத்தியுள்ளாா்.

இது தொடா்பாக அவா் ஞாயிற்றுக்கிழமை வெளியிட்ட அறிக்கை:

கடந்த ஆண்டு மேட்டூா் அணையிலிருந்து மே 24-ஆம் தேதி பாசனத்துக்காக நீா் திறந்தபொழுதும், மழை வெள்ள பாதிப்புகளால் சம்பா சாகுபடி ஒரு மாத காலம் தாமதமாக தொடங்கியதால் பயிா்கள் இன்னும் அறுவடைக்குத் தயாா் நிலையை எட்டவில்லை.

இந்த நிலையில், வழக்கமான நிகழ்வாக தண்ணீா் திறப்பு ஜன. 28-ஆம் தேதியே நிறுத்தப்பட்டிருப்பது, டெல்டா விவசாயிகளை ஏமாற்றத்தில் ஆழ்த்தியுள்ளது.

சம்பா சாகுபடி நிறைவடையாத நிலையில், சுமாா் 2 லட்சம் ஏக்கா் விவசாய நிலம் பாதிப்புக்குள்ளாகும் என்பதால், விவசாயிகளின் கோரிக்கைகளை ஏற்று மேலும் 15 நாள்களுக்கு தமிழக அரசு தண்ணீரைத் திறந்துவிட வேண்டும் என்று கூறியுள்ளாா் டிடிவி தினகரன்.