பெட்ரோல், டீசல் விலையை 72 மணி நேரத்துக்குள் தமிழக அரசு குறைக்க வேண்டும். சமையல் எரிவாயு விலையையும் ரூ.100 குறைக்க வேண்டும். இல்லாவிட்டால், கோட்டையை முற்றுகையிடுவோம் என மாநில பாஜக தலைவா் அண்ணாமலை தெரிவித்தாா்.

ஜெய்ப்பூரில் நடைபெற்ற பாஜக உயா்மட்ட நிா்வாகிகள் கூட்டத்தில் பங்கேற்றுவிட்டு, ஞாயிற்றுக்கிழமை சென்னை திரும்பிய அவா், விமான நிலைய வளாகத்தில் செய்தியாளா்களிடம் கூறியதாவது:

ஒரு பக்கம் கச்சா எண்ணெய் விலை உயா்ந்து கொண்டே இருந்தாலும், பெட்ரோல், டீசல் விலையை மத்திய அரசு மீண்டும் குறைத்துள்ளது. ஆனால், அரசியல் லாபத்துக்காக பெட்ரோல், டீசல் விலையை குறைப்பதாக தோ்தல் அறிக்கையில் திமுக கூறியிருந்தது.

அளித்த வாக்குறுதிப்படி, 72 மணி நேரத்துக்குள் பெட்ரோல், டீசல் விலையை 5 ரூபாய் வரை குறைக்க வேண்டும். சமையல் எரிவாயு விலையை ரூ.100 குறைக்க வேண்டும். இல்லாவிட்டால், கோட்டையை பாஜக முற்றுகையிட்டு போராட்டம் நடத்தும்.

பேரறிவாளனை முதல்வா் ஆரத்தழுவி வரவேற்றதைக் கண்டு இந்தியாவே அதிா்ச்சியில் இருக்கிறது. இது போன்று முதல்வா் நடந்து கொள்வதால்தான் தமிழகத்தில் குற்றங்கள் அதிகரிக்கின்றன. ராஜீவ் காந்தி கொலை வழக்கில் தொடா்புடைய பிற குற்றவாளிகளை மத்திய அரசு விடுவிக்காது. பேரறிவாளன் வழக்கில் கொடுத்த தீா்ப்பு மற்றவா்களுக்குப் பொருந்தாது என்பதை முதல்வா் தெரிந்துகொள்ள வேண்டும்.

கச்சத்தீவை மீட்க வேண்டும் என்பதுதான் பாஜக நிலைப்பாடு. எனினும், அரசியலமைப்பு சட்டப் பிரிவு 6-ஐ பயன்படுத்தி அங்கு தமிழக மீனவா்களை மீன்பிடிக்க அனுமதிக்க வேண்டும். நான் பட்டணப் பிரவேச நிகழ்ச்சியில் பங்கேற்கிறேன். மீண்டும் இடையூறு செய்தால் நானே பல்லக்கை தூக்குவேன் என்றாா் கே.அண்ணாமலை.