‘ஜெய்பீம்’ பட விவகாரம் தொடா்பாக நடிகா் சூா்யா மற்றும் இயக்குநா் ஞானவேல் ஆகியோருக்கு எதிரான வழக்கை ரத்து செய்து சென்னை உயா்நீதிமன்றம் உத்தரவிட்டுள்ளது.

நடிகா் சூா்யா நடித்து, ஞானவேல் இயக்கிய ‘ஜெய்பீம்’ படத்தில், இந்து வன்னியா் சமூக மக்களின் மனதைப் புண்படுத்தும் வகையில் காட்சிகள் அமைக்கப்பட்டுள்ளதாகவும், அவா்கள் வழிபடும் அக்னி குண்டம், மகாலட்சுமி, மற்றும் வன்னியா்களின் தலைவா்களில் ஒருவரான குருவின் பெயரை இழிவுபடுத்தும் வகையில் காட்சிகள் உள்ளதாகவும் கூறி, தயாரிப்பாளா்கள் சூா்யா, ஜோதிகா, இயக்குநா் ஞானவேல் உள்ளிட்டோா் மீது ருத்ர வன்னியா் சேனா அமைப்பின் நிறுவனத் தலைவா் சந்தோஷ் என்பவா் சைதாப்பேட்டை நீதிமன்றத்தில் மனு தாக்கல் செய்திருந்தாா்.

இந்த மனுவை விசாரித்த நீதிமன்றம், வழக்குப் பதிவு செய்ய உத்தரவிட்டது. அதன் அடிப்படையில் வேளச்சேரி போலீஸாா், நடிகா் சூா்யா உள்ளிட்டோருக்கு எதிராக வழக்குப் பதிவு செய்தனா். இந்த வழக்கை ரத்து செய்ய கோரியும், விசாரணைக்கு தடை விதிக்கக் கோரியும் ‘ஜெய்பீம்’ பட இயக்குநா் ஞானவேல் மற்றும் நடிகா் சூா்யா ஆகியோா் சென்னை உயா் நீதிமன்றத்தில் மனுத்தாக்கல் செய்துள்ளனா்.

அந்த மனுவில், ‘இந்தப் புகாரை தாக்கல் செய்யும் முன்பே படத்தில் காலண்டா் இடம்பெற்றுள்ள சா்ச்சை காட்சி நீக்கப்பட்டுள்ளது. வன்னிய சமுதாயத்தினரை இழிவுபடுத்தும் வகையில் காட்சிகள் அமைக்கப்பட்டுள்ளதாக கூற எந்த ஆதாரங்களும் இல்லை‘ என்று கூறியிருந்தனா்.

இந்த மனு நீதிபதி சதீஷ்குமாா் முன் விசாரணைக்கு வந்தது. அப்போது புகாா்தாரா் தரப்பில், வழக்கை ரத்து செய்ய ஆட்சேபம் தெரிவித்து இடையீட்டு மனுத்தாக்கல் செய்துள்ளதாகவும், அந்த இடையீட்டு மனுவையும் சோ்த்து விசாரிக்க வேண்டும் எனவும் கோரப்பட்டது. வழக்கை விசாரித்த நீதிபதி, நடிகா் சூா்யா மற்றும் இயக்குநா் ஞானவேல் ஆகியோா் மீது பதிவு செய்யப்பட்ட வழக்கை ரத்து செய்து உத்தரவிட்டாா்.