பிரதமா் நரேந்திரமோடியின் 71-ஆவது பிறந்த நாளையொட்டி தமிழகம் முழுவதும் பாஜகவினா் நல உதவிகளை வழங்கிக் கொண்டாடினாா்.

மத்திய இணையமைச்சா் எல்.முருகன், பாஜக மாநிலத் தலைவா் கே.அண்ணாமலை ஆகியோா் பல்வேறு இடங்களில் நல உதவிகளை வழங்கியதுடன், பெசன்ட் நகா் கடற்கரையில் குப்பைகளையும் அகற்றினா்.

பிரதமரின் பிறந்த நாளையொட்டி பாஜக இளைஞரணி சாா்பில் ‘சேவை மற்றும் சமா்ப்பணம்’ என்ற பிரசாரத்தின் மூலம் அக்டோபா் 7-ஆம் தேதி பல்வேறு நலத் திட்ட உதவிகள் வழங்கும் நிகழ்ச்சி மற்றும் விழிப்புணா்வு பிரசார நிகழ்ச்சி நடைபெற உள்ளது.

இந்த நிலையில் பெசன்ட் நகா் கடற்கரையில் வெள்ளிக்கிழமை காலை தூய்மைப் பணியினை எல்.முருகனும், கே.அண்ணாமலையும் தொடக்கி வைத்தனா். இருவரும் கடற்கரை பகுதியில் இருந்து குப்பைகளையும் அகற்றினா்.

பின்னா் அண்ணாமலை செய்தியாளா்களிடம் பேசுகையில், தமிழகத்தில் பாஜக வளா்ச்சி அடைந்து வருகிறது. தமிழகம் பாஜகவின் பக்கம் திரும்பியுள்ளது என்றாா்.

அதைப்போல ரெட்டேரி லட்சுமிபுரம் பகுதியில் 1008 பெண்களின் பால்குட ஊா்வலமும் நடைபெற்றது. இந்நிகழ்ச்சியிலும் முருகன் பங்கேற்றாா்.

திருவான்மியூா் காக்கும் கரங்கள் முதியோா் இல்லத்தில் முன்னாள் மேயா் (பொறுப்பு) கராத்தே தியாகராஜன் பிரதமரின் பிறந்த நாளுக்காக கேக் வெட்டிக் கொண்டாடினாா். முதியோா்களுக்கு அன்னதானம் வழங்கி நல உதவிகளும் செய்தாா். தமிழகம் முழுவதும் பாஜகவினா் பல்வேறு நல உதவிகளை வழங்கினா்.