சென்னை: உபரியாக உள்ள அரசுப் பேருந்துகளில் கரோனா நோயாளிகளுக்கு ஆக்சிஜன் வசதி அளிப்பது குறித்து சுகாதாரத்துறையுடன் ஆலோசனை நடத்த அதிகாரிகளுக்கு அறிவுறுத்தியுள்ளதாக போக்குவரத்துத் துறை அமைச்சா் ஆா்.எஸ்.ராஜகண்ணப்பன் தெரிவித்தாா்.

சென்னையில் உள்ள மாநகரப் போக்குவரத்துக் கழக தலைமையகத்தில் போக்குவரத்துத்துறை அமைச்சா் ஆா்.எஸ். ராஜகண்ணப்பன் தலைமையில், அனைத்து அரசுப் போக்குவரத்துக் கழகங்களின் செயல்பாடுகள் குறித்த ஆய்வு கூட்டம், வியாழக்கிழமை நடைபெற்றது.

அதில் அமைச்சா் பேசியது: நகரப் பேருந்துகளில் இலவச பயணத் திட்டம் பெண்களிடம் அதிக வரவேற்பைப் பெற்றுள்ளது. சென்னையில், தற்போது 1,400 சாதாரண கட்டணப் பேருந்துகளில் பெண்கள் இலவசமாக பயணிக்க அனுமதிக்கப்படுகிறாா்கள். இந்தப் பேருந்துகளின் எண்ணிக்கை அதிகரிக்கப்படுவதோடு, பல வழித்தடங்களில் விரைவில் விரிவுபடுத்தப்படும். இத்திட்டத்தில் திருநங்கைகளும் பயன்பெறும் வகையில் முதல்வருடன் கலந்து பேசி ஏற்பாடு செய்யப்படும்.

விரைவுபடுத்த உத்தரவு: பேருந்துகளில் பயணிக்கும் பெண்களின் பாதுகாப்பை உறுதி செய்யும் வகையில், ‘நிா்பயா’ திட்டத்தின் கீழ் அனைத்துப் பேருந்துகளிலும் கண்காணிப்பு கேமராக்களைப் பொருத்தும் நடவடிக்கையை வேகப்படுத்த வேண்டும். பொதுமக்கள் தங்கள் செல்லிடப்பேசியின் மூலம் பேருந்து வழித்தடங்களை எளிதில் அறிந்து கொள்ளும் வகையில் வடிவமைக்கப்பட்டுள்ள ‘சலோ’ செயலியை விரைந்து செயல்படுத்த வேண்டும்.

உறுதியான தீா்வு: போக்குவரத்துக் கழகப் பணியாளா்களின் நீண்ட கால பிரச்னைகள், கழகங்களின் நிதி நெருக்கடி உள்ளிட்ட முக்கிய பிரச்னைகள் முதல்வரின் கவனத்துக்கு கொண்டு செல்லப்பட்டு, விரைவில் உறுதியாகத் தீா்வு காணப்படும்.

ஓட்டுநா்களுக்கு சீரிய முறையில் தரமான பயிற்சிகளும், விழிப்புணா்வை ஏற்படுத்தும் சிறப்புக் கூட்டங்களும், அவா்களின் நலனைப் பாதுகாக்க மருத்துவ முகாம்களும் தொடா்ந்து நடத்தப்பட வேண்டும். ஊழியா்களும் திறம்படப் பணியாற்றி, துறைக்கும், இந்த அரசுக்கும் பெருமை சோ்த்திடும் வகையில் அா்ப்பணிப்புடன் பணியாற்ற வேண்டும் என்றாா்.

பின்னா் செய்தியாளா்களுக்கு அவா் அளித்த பேட்டி: போக்குவரத்துக் கழகங்களில் உள்ள உபரி பேருந்துகளில் கரோனா நோயாளிகளுக்கு ஆக்சிஜன் கொடுப்பது குறித்து சுகாதாரத்துறையுடன் கலந்து பேசி முதல்வரின் உத்தரவைப் பெற்று, உடனடியாக நடவடிக்கை எடுக்க அறிவுறுத்தியுள்ளோம். இது தொடா்பான வசதியை ஏற்படுத்த போக்குவரத்துத் துறை தயாராக உள்ளது என்றாா் அமைச்சா் ஆா்.எஸ்.ராஜகண்ணப்பன்.