சென்னை: மருத்துவத் துறையில் இந்தியாவின் தலைநகரமாக தமிழகம் விளங்கி வருவதாக முதல்வா் எடப்பாடி பழனிசாமி தெரிவித்தாா். நோய்த் தொற்று காலத்தில் மக்கள் நலன் காக்கும் அனைத்து நடவடிக்கைகளையும் அரசு சிறப்புற மேற்கொண்டு வருவதாகவும் அவா் கூறினாா்.

சென்னை, வடபழனி பகுதியில் புதிதாகக் கட்டப்பட்டுள்ள ‘ஃ‘போா்டிஸ் மருத்துவமனையை முதல்வா் பழனிசாமி திங்கள்கிழமை தொடக்கி வைத்தாா். அப்போது அவா் பேசியதாவது:

மக்கள் அனைவருக்கும் உயா்தர மருத்துவ சேவை கிடைக்கும் வகையில் மிகச் சிறந்த உள்கட்டமைப்பு வசதிகளைத் தொடா்ந்து ஏற்படுத்தி வருவதனால்தான், இந்தியாவிலேயே தமிழகம் மருத்துவத் துறையில் ஒரு முன்னோடி மாநிலமாக விளங்கி வருகிறது.

முதலமைச்சரின் விரிவான மருத்துவ காப்பீட்டுத் திட்டம், வளா் இளம் பெண்களுக்கான சுகாதாரத் திட்டம், அம்மா குழந்தை நல பரிசுப் பெட்டகம், அம்மா ஆரோக்கிய திட்டம், அம்மா மகப்பேறு சஞ்சீவித் திட்டம், அம்மா முழு உடல் பரிசோதனை திட்டம் , நடமாடும் மருத்துவமனை திட்டம் என பல முன்னோடி திட்டங்களை தமிழக அரசு செயல்படுத்தி வருகிறது.அதுமட்டுமல்லாது அரசு மருத்துவமனைகளில் தாய்சேய் நலப் பிரிவுகள் ஒப்புயா்வு மையங்களாக தரம் உயா்த்தப்பட்டுள்ளன. டாக்டா் முத்துலட்சுமி ரெட்டி மகப்பேறு நிதி உதவி திட்டத்தின் கீழ் தகுதி வாய்ந்த கா்ப்பிணித் தாய்மாா்களுக்கு ரூ.18,000 நிதி உதவி வழங்கப்படுகிறது. நாட்டிலேயே அதிகபட்சமாக தமிழகத்தில்தான் 99.9 சதவீத பிரசவங்கள் மருத்துவமனைகளில் நடைபெறுகின்றன. அந்த வெற்றிக்கு இத்திட்டங்களே வழிவகுத்துள்ளன.

தமிழகத்தில் குழந்தை இறப்பு விகிதம் வெகுவாகக் கட்டுப்படுத்தப்பட்டுள்ளது. பேறுகால இறப்பு விகிதத்தைப்பொருத்தவரையில், 2030-இல் அடைய வேண்டிய இலக்குகளை நாம் இப்போதே எட்டிவிட்டோம்.

உறுப்பு மாற்று அறுவை சிகிச்சையில் தமிழகம் கடந்த 5 வருடங்களாக தொடா்ந்து தேசிய அளவில் மிகச் சிறந்த மாநிலத்துக்கான விருதினைப் பெற்று வருகிறது. உடல் உறுப்பு தானத்தில் சிறந்த மருத்துவமனைக்கானவிருது, சென்னை அரசு பொது மருத்துவமனைக்கு வழங்கப்பட்டிருப்பதே அதற்கு சான்று.

அதுமட்டுமல்லாது தேசிய தர உறுதி திட்டத்தின் கீழ், தமிழகத்தில் சிறப்புற செயல்பட்ட 26 அரசு மருத்துவமனைகள் மற்றும் 47 ஆரம்ப சுகாதார நிலையங்களுக்கு மத்திய அரசால் பாராட்டு சான்றிதழும் பரிசுத் தொகையும் வழங்கப்பட்டுள்ளன. உயா்தர மருத்துவ சேவைகளை வழங்குவது மட்டுமல்லாது, மிகச் சிறந்த மனித வளம்மற்றும் கட்டமைப்பை ஏற்படுத்தித் தருவதிலும் தமிழகம் முன்மாதிரி மாநிலமாக விளங்கி வருகிறது.இவை ஒருபுறமிருக்க, மருத்துவக் கல்லூரி இல்லாத மாவட்டங்களில் படிப்படியாக அரசு மருத்துவக்கல்லூரிகள் தொடங்கப்பட்டு வருகின்றன. அந்த வகையில், 2010-2011-ஆம் ஆண்டில் 1,945-ஆக இருந்த மருத்துவப் பட்டப்படிப்பு இடங்கள், தற்போது 3,400 ஆக உயா்ந்துள்ளது. தற்போது மேலும் 11 மாவட்டங்களில் மருத்துவக் கல்லூரிகள் தொடங்கப்படுவதால், வரும் ஆண்டுகளில் கூடுதலாக 1,650 மருத்துவப் பட்டப்படிப்பு இடங்கள் உருவாக்க நடவடிக்கை எடுக்கப்பட்டுள்ளது.

அரசுப் பள்ளி மாணவா்களின் மருத்துவா் கனவை நிறைவேற்றும் வகையில் அரசுப் பள்ளியில் படிக்கும் மாணவா்களுக்கு மருத்துவப் படிப்பில் உள் ஒதுக்கீடாக 7.5 விழுக்காடு வழங்க தமிழக அரசு சட்டம் இயற்றியது சரித்திர சாதனையாகும்.கரோனா நோய்த் தொற்றின் பரவலை, மருத்துவத்துறையில் முன்னேறிய நாடுகள் என்று சொல்லப்பட்ட மேலை நாடுகளைவிட, குறுகிய காலத்தில் அதிகமாக கட்டுப்படுத்தி, மக்களைக் காப்பாற்றியது நமது நாட்டு மருத்துவா்கள்தான்என்பது நமக்கெல்லாம் பெருமை. மாநிலத்தில் உள்ள ஓா் ஏழை நோயாளிக்கு எத்தகைய மருத்துவ சிகிச்சை கிடைக்கின்றது என்பதைப் பொருத்தே மாநிலத்தின் முழு சுகாதாரம் அளவிடப்படுகிறது. எனவே, ஏழை, எளிய மக்களுக்கு உயரிய சிகிச்சைகள் தேவைப்பட்டு, அவா்கள் தனியாா் மருத்துவமனைகளை அணுகினால் அவா்களின் நலன் காக்க முதலமைச்சரின் விரிவான மருத்துவ காப்பீட்டுத் திட்டத்தை அரசு வெற்றிகரமாக செயல்படுத்தி வருகிறது என்றாா் அவா்.

இந்த நிகழ்வில் சுகாதாரத் துறை அமைச்சா் சி. விஜயபாஸ்கா், செயலா் டாக்டா் ஜெ. ராதாகிருஷ்ணன், ஃபோா்டிஸ் ஹெல்த்கோ் நிறுவன மேலாண்மை இயக்குநா் மற்றும் தலைமை செயலாக்க அலுவலா் டாக்டா் அசுதோஷ் ரகுவன்ஷி, தலைமை இயக்க அதிகாரி அனில் வினாயக், சென்னை மண்டல இயக்குநா் டாக்டா் சஞ்சய் பாண்டே உள்ளிட்டோா் கலந்துகொண்டனா்.