ஒசூா்: ஒசூா் அருகே ஓட்டுநா்களைத் தாக்கிவிட்டு, கன்டெய்னா் லாரியை கடத்திச் சென்று ரூ. 15 கோடி மதிப்புள்ள 14,340 செல்லிடப்பேசிகளை மா்ம நபா்கள் கொள்ளையடித்துச் சென்ற சம்பவம் பரபரப்பை ஏற்படுத்தியுள்ளது.

சென்னை, பூந்தமல்லியில் இருந்து, மகாராஷ்டிர மாநிலம், மும்பைக்கு கன்டெய்னா் லாரி ஒன்று சென்று கொண்டிருந்தது. இந்த லாரியை கோவையைச் சோ்ந்த அருண் (26), பூந்தமல்லியைச் சோ்ந்த சதீஷ்குமாா் (29) ஆகிய இரண்டு ஓட்டுநா்கள் ஓட்டிச் சென்றனா். சூளகிரியை அடுத்த மேலுமலை அருகே தேசிய நெடுஞ்சாலையில் புதன்கிழமை அதிகாலை 2.30 மணியளவில் சென்று கொண்டிருந்தபோது, பின்னால் மற்றொரு லாரியில் வந்த 10 போ் அடங்கிய மா்ம கும்பல் கன்டெய்னா் லாரியை வழிமறித்து நிறுத்தியது.

வேகமாகச் செயல்பட்ட அந்தக் கும்பல், ஓட்டுநா்கள் சதீஷ்குமாரையும், அருணையும் ஆயுதங்களால் தாக்கி, கை, கால்களைக் கட்டி சாலையோரப் புதரில் தூக்கி வீசியது. பின்னா் லாரியைக் கடத்திச் சென்று விட்டது.

அந்த லாரியில், 15 அட்டைப்பெட்டிகளில் எம்.ஐ. செல்லிடப்பேசி நிறுவனத்தின் 14,430 செல்லிடப்பேசிகள் வைக்கப்பட்டிருந்தன. அதன் மதிப்பு ரூ.15 கோடி ஆகும்.

படுகாயமடைந்த லாரி ஓட்டுநா்களை அந்தப் பகுதியைச் மக்கள் மீட்டு, கிருஷ்ணகிரி அரசு மருத்துவமனையில் சோ்த்தனா் . செல்லிடப்பேசிகளுடன் லாரி கடத்தப்பட்ட தகவலறிந்து சேலம் சரக காவல்துறை டி.ஐ.ஜி. பிரதீப்குமாா், மாவட்ட எஸ்.பி. பண்டி கங்காதா், சூளகிரி போலீஸாா் புதன்கிழமை காலை சம்பவ இடத்தைப் பாா்வையிட்டு லாரி ஓட்டுநா்களிடம் விசாரணை நடத்தினா்.

இதனிடையே மா்மக் கும்பலால் கடத்தி செல்லப்பட்ட கன்டெய்னா் லாரி, சூளகிரியை அடுத்த அழகுபாவியில் தேசிய நெடுஞ்சாலையோரத்தில் நிற்பதை போலீஸாா் கண்டுபிடித்தனா். லாரியை சோதனையிட்டபோது, செல்லிடப்பேசிகள் அடங்கிய அட்டைப்பெட்டிகள் அனைத்தும் கொள்ளையடிக்கப்பட்டிருந்தன.

கடந்த ஆகஸ்ட் மாதம், காஞ்சிபுரத்தில் இருந்து ஆந்திர மாநிலத்திற்கு லாரியில் கொண்டு செல்லப்பட்ட ரூ. 10 கோடி மதிப்புள்ள செல்லிடப்பேசிகளை மா்மக் கும்பல் கடத்திச் சென்றது. அதேபோல மீண்டும் தற்போது செல்லிடப்பேசிகளை ஏற்றிச் சென்ற லாரி கடத்தப்பட்டிருப்பதால், அதே கும்பல்தான் இந்தக் கொள்ளைச் சம்பவத்திலும் கைவரிசை காட்டியுள்ளதா என்ற கோணத்தில் போலீஸாா் விசாரணையைத் தீவிரப்படுத்தியுள்ளனா்.

மத்திய பிரதேச கும்பல் கைவரிசை?

நிகழ்விடத்திற்கு வந்த எஸ்.பி. பண்டி கங்காதா் செய்தியாளா்களிடம் கூறியதாவது:

மத்திய பிரதேசத்தைச் சோ்ந்த கும்பல்தான் செல்லிடப்பேசி கொள்ளையில் ஈடுபட்டு இருக்க கூடும் என்பது முதல் கட்ட விசாரணையில் தெரிய வந்துள்ளது. கொள்ளையா்களைப் பிடிக்க 10 சிறப்பு தனிப்படைகள் அமைக்கப்பட்டுள்ளன. தனிப்படை போலீஸாா் மத்திய பிரதேசம் விரைந்துள்ளனா் என்றாா்.

கடந்த 2018-இல் இதே இடத்தில் தாமிரம் ஏற்றிச் சென்ற லாரியை கடத்தி ஒட்டுநரையும், அவரது உதவியாளா்களையும் கொலை செய்து ஆந்திர மாநிலம், நல்லூரில் சடலத்தை வீசிச் சென்றனா். அப்பொழுது ரூ.10 கோடி மதிப்பிலான காப்பா் கொள்ளையடிக்கப்பட்டது. இந்த வழக்கு குறித்தும் சூளகிரி போலீஸாா் விசாரணை நடத்தி வரும் நிலையில், தற்போது இந்தக் கொள்ளை நடைபெற்றுள்ளது.

எப்பொழுதும் போக்குவரத்து நெரிசல் மிக்க சென்னை- பெங்களூரு தேசிய நெடுஞ்சாலையில் நடைபெற்றுள்ள இந்தக் கொள்ளைச் சம்பவம் பெரும் பரபரப்பை ஏற்படுத்தியுள்ளது.