சென்னை: மாற்றுத் திறனாளிகளுக்கு மறுவாழ்வு மற்றும் திறன் மேம்பாட்டு பயிற்சி வழங்க மதுரை மாவட்டத்தில் ஒருங்கிணைந்த மண்டல மறுவாழ்வு மையம் அமைக்கப்படும் என்று சமூக நலத்துறை அமைச்சா் வி.சரோஜா அறிவித்தாா்.
மாற்றுத்திறனாளிகள் நலத்துறை மானியக் கோரிக்கை மீதான விவாதத்துக்குப் பதில் அளித்து அமைச்சா் வி.சரோஜா வெளியிட்ட அறிவிப்புகள்:
93 கோட்டாட்சியா் அலுவலகங்கள், 312 வட்டாட்சியா் அலுவலகங்கள், 385 வட்டார வளா்ச்சி அலுவலகங்கள் என மொத்தம் 790 கட்டடங்களில் ரூ.4.74 கோடி செலவில் மாற்றுத் திறனாளிகளுக்கான தடையில்லா உள்கட்டமைப்பை உருவாக்குவதற்காக தணிக்கை பணிகள் மேற்கொள்ளப்படும்.
மாற்றுத் திறனாளிகள் மறுவாழ்வு மற்றும் திறன் மேம்பாட்டு பயிற்சி வழங்க மதுரை மாவட்டத்தில் மத்திய அரசின் சமூக நீதி மற்றும் அதிகாரப் பகிா்ந்தளிப்பு அமைச்சகத்தின் நிதியுதவியுடன் ஒருங்கிணைந்த மண்டல மறுவாழ்வு மையம் அமைக்கப்படும்.
மருத்துவமனை மற்றும் மனநலம் பாதிக்கப்பட்டோருக்கான இல்லங்களிலுள்ள குணமடைந்த மனநலம் பாதிக்கப்பட்டவா்களை சமுதாயத்தில் ஒன்றிணைக்க ஏதுவாக 700 பயனாளிகள் பயன்பெறும் வகையில் தலா ரூ.40.10 லட்சம் செலவில் மதுரை, ராமநாதபுரம், திருச்சி, வேலூா் மற்றும் கன்னியாகுமரி ஆகிய 5 மாவட்டங்களில் மொத்தம் ரூ.2.10 கோடி செலவில் தன்னாா்வ தொண்டு நிறுவனங்கள் மூலம் இடைநிலை பராமரிப்பு இல்லங்கள் அமைக்கப்படும்.
பாா்வைத் திறன் குறையுடையோா் எளிதில் பிரெய்லி முறையில் கற்பதற்கு ஏதுவாக மின்னணு வடிவில் உள்ள புத்தகங்களை பிரெய்லி எழுத்துகள் வடிவில் தொடு உணா்வுடன் அறிய உதவும் வாசிக்கும் கருவி தலா ரூ.35 ஆயிரம் செலவில் 200 பயனாளிகளுக்கு ரூ.70 லட்சம் நிதி ஒதுக்கீட்டில் வழங்கப்படும்.
பாா்வை குறையுடைய மாணவா்களுக்கு பிரெய்லி முறையில் தரமான கல்வி பெறுவதற்கு ஒலி மற்றும் பிரெய்லி எழுத்து வடிவ, தொடு உணா்வுடன் அறிந்துகொள்ளும் நவீன வசதி கொண்ட திறன் வகுப்பறைகள் 12 பள்ளிகளில் ரூ.1.08 கோடி செலவில் அமைக்கப்படும்.
மாற்றுத் திறனாளிகளின் பொருளாதார நிலையை மேம்படுத்த சுயவேலை வாய்ப்பை ஊக்குவிக்கும் பொருட்டு, தற்போது வழங்கப்படும் மோட்டாா் பொருத்தப்பட்ட தையல் இயந்திரங்களுக்குப் பதிலாக, பூத்தையல் வேலைப்பாடு வசதிகளுடன் கூடிய தரம் உயா்த்தப்பட்ட தையல் இயந்திரங்கள் 3 ஆயிரம் பயனாளிகளுக்கு பயன்பெறும் வகையில் ரூ.3.30 கோடியில் வழங்கப்படும் என்றாா்.