ரஞ்சி கோப்பை இறுதிச்சுற்றில் மும்பைக்கு எதிராக முதல் இன்னிங்ஸில் முன்னிலை பெற்றுள்ளது மத்தியப் பிரதேச அணி.

பெங்களூரு எம். சின்னசாமி மைதானத்தில் நடைபெற்று வரும் இறுதிச்சுற்றில் மும்பை - மத்தியப் பிரதேச அணிகள் மோதி வருகின்றன. 41 முறை சாம்பியன் பட்டம் வென்ற மும்பை அணி, 2016-17-க்குப் பிறகு ரஞ்சி கோப்பை இறுதிச்சுற்றுக்குத் தகுதி பெற்றுள்ளது.

மும்பை அணி முதல் இன்னிங்ஸில் 127.4 ஓவர்களில் 374 ரன்களுக்கு ஆட்டமிழந்தது. ஜெயிஸ்வால் 78, சர்ஃபராஸ் கான் 134 ரன்கள் எடுத்தார்கள். 

3-ம் நாள் முடிவில் ம.பி. அணி 123 ஓவர்களில் 3 விக்கெட் இழப்புக்கு 368 ரன்கள் எடுத்தது. ரஜத் படிதார் 67 ரன்களும் கேப்டன் ஆதித்யா ஸ்ரீவஸ்தவா 11 ரன்களும் எடுத்து ஆட்டமிழக்காமல் இருந்தார்கள்.

இந்நிலையில் இன்று கூடுதலாக 7 ரன்கள் எடுத்து முதல் இன்னிங்ஸில் முன்னிலை பெற்றது ம.பி. அணி. ஆதித்யா ஸ்ரீவஸ்தவா 25, அக்‌ஷத் 9 ரன்களில் ஆட்டமிழந்தார்கள். 

142-வது ஓவரின் முடிவில் ம.பி. அணி 5 விக்கெட் இழப்புக்கு 424 ரன்கள் எடுத்து விளையாடி வருகிறது. ரஜத் படிதார் 89, சஹானி 11 ரன்களுடன் களத்தில் உள்ளார்கள். தற்போது ம.பி. அணி முதல் இன்னிங்ஸில் 5 விக்கெட் மீதமுள்ள நிலையில் 50 ரன்கள் முன்னிலை பெற்று வலுவான நிலையில் உள்ளது. இதன்மூலம் ரஞ்சி கோப்பையை வெல்லும் கனவில் உள்ளது. 

கடைசி இரு நாள்களில் ஆட்டத்தில் திருப்பத்தை ஏற்படுத்தி மும்பை அணியால் கோப்பை வெல்ல முடியுமா?