செய்திகள்

விஜய் ஹசாரே இறுதிச்சுற்றிலும் சதமடித்த ருதுராஜ் கெயிக்வாட்!

2nd Dec 2022 12:31 PM

ADVERTISEMENT

 

விஜய் ஹசாரே கோப்பை இறுதிச்சுற்றில் மஹாராஷ்டிர அணியின் கேப்டன் ருதுராஜ் கெயிக்வாட் சதமடித்துள்ளார்.

விஜய் ஹசாரே கோப்பைப் போட்டிக்காக ஆமதாபாத்தில் நடைபெற்று வரும் இறுதிச்சுற்றில் மஹாராஷ்டிரம் - செளராஷ்டிரம் அணிகள் மோதுகின்றன. விஜய் ஹசாரே இறுதிச்சுற்றுக்கு முதல்முறையாகத் தகுதியடைந்துள்ளது மஹாராஷ்டிரம். செளராஷ்டிர அணி, 2-வது முறையாகக் கோப்பையை வெல்லும் முனைப்பில் உள்ளது. டாஸ் வென்ற செளராஷ்டிர அணி ஃபீல்டிங்கைத் தேர்வு செய்தது.

ஆரம்பத்தில் 4 ரன்களுக்கு பவன் ஷா ஆட்டமிழந்ததால் நிதானமாக விளையாடினார் ருதுராஜ். அரை சதத்தை எட்ட அவருக்கு 96 பந்துகள் தேவைப்பட்டன. அதன்பிறகு தனது அதிரடி ஆட்டத்தை வெளிப்படுத்தினார். காலிறுதியில் இரட்டைச் சதமும் அரையிறுதியில் சதமும் எடுத்த ருதுராஜ், இறுதிச்சுற்றில் 125 பந்துகளில் சதமடித்தார். இறுதியில் 131 பந்துகளில் 4 சிக்ஸர்கள், 7 பவுண்டரிகளுடன் 108 ரன்களுக்கு ஆட்டமிழந்தார். 

ADVERTISEMENT

2021 முதல் விஜய் ஹசாரே போட்டியில் 10 இன்னிங்ஸிலேயே 7 சதங்களும் ஒரு இரட்டைச் சதமும் எடுத்துள்ளார் ருதுராஜ்.  

136(112)
154*(143)
124(129)
21(18)
168(132)
124*(123)
40(42)
220*(159)
168(126)
108(131)

ADVERTISEMENT
ADVERTISEMENT