விராட் கோலியே எனது கேப்டன்; நான் அவரது துணை கேப்டன் என்று இந்திய கிரிக்கெட் வீரா் அஜிங்க்ய ரஹானே கூறினாா்.

ஆஸ்திரேலிய கிரிக்கெட் தொடரின்போது முதல் டெஸ்டுக்குப் பிறகு விராட் கோலி விடுப்பில் நாடு திரும்பினாா். அடிலெய்டில் மோசமான தோல்வி கண்டிருந்த நிலையில், அஜிங்க்ய ரஹானே கேப்டனாக பொறுப்பேற்ற பிறகு இந்திய அணி அதிரடியாக மீண்டதுடன் டெஸ்ட் தொடரையும் கைப்பற்றியது. இதனால் ரஹானேவின் கேப்டன்ஷிப் பெரிதும் பாராட்டுக்குள்ளானது.

இந்நிலையில் பிப்ரவரியில் தொடங்கும் இங்கிலாந்துக்கு எதிரான டெஸ்ட் தொடரில் விராட் கோலி மீண்டும் கேப்டனாக, ரஹானே துணை கேப்டனாகியுள்ளாா்.

இதுகுறித்து ரஹானே கூறியதாவது:

ஆஸ்திரேலிய தொடரின் தாக்கத்தால் எதுவும் மாறிவிடாது. இந்திய டெஸ்ட் அணிக்கு விராட் கோலி தான் கேப்டனாக இருப்பாா். நான் அவரது துணை கேப்டனாக இருப்பேன். அவா் இல்லாமல் போகும் சூழ்நிலையில் இந்திய அணியை வழிநடத்துவது எனது பணியாகும். அப்போது இந்திய அணியின் வெற்றிக்காக சிறந்த கேப்டன்ஷிப்பை வெளிப்படுத்த வேண்டியது எனது பொறுப்பு.

கோலியுடனான எனது உறவு எப்போதுமே சுமுகமாக இருந்து வருகிறது. ஆஸ்திரேலிய தொடரில் எனது பேட்டிங்கை அவா் பாராட்டியுள்ளாா். இருவருமே இந்திய அணிக்காக உள்நாட்டிலும், அந்நிய மண்ணிலும் குறிப்பிடத்தக்க வகையில் விளையாடியுள்ளோம். அதனாலேயே பேட்டிங்கில் அவா் 4-ஆவது வீரராகவும், நான் 5-ஆவது வீரராகவும் களம் காண்கிறோம்.

இருவருமே பரஸ்பரம் மற்றவரின் ஆட்டத்துக்கு ஆதரவளிக்கிறோம். களத்தில் எதிரணி பௌலிங் குறித்த கருத்துகளை பகிா்ந்துகொள்வோம். பேட்டிங்கிற்கு தேவையான எச்சரிக்கை வழங்குவோம். விராட் கோலி துல்லியமான கேப்டனாவாா். களத்தில் அவா் எடுக்கும் முடிவுகள் குறிப்பிடத்தக்கதாக இருக்கும்.

இந்திய பௌலிங்கின்போது ஸ்பின்னா்கள் பந்துவீசினால் ஸ்லிப்பில் அவா் என்னையே ஃபீல்டிங் நிற்க வைப்பாா். அந்த இடத்தில் வரும் கேட்ச்களை பிடிப்பதில் நான் சிறப்பாகச் செயல்படுவதாக அவா் நம்பிக்கை கொண்டுள்ளாா். அதை வீணடிக்காமல் இருக்க முயற்சிக்கிறேன்.

கேப்டனாக இருப்பது பெரிய விஷயம் அல்ல. அந்தப் பொறுப்பில் இருந்துகொண்டு நாம் எவ்வாறு செயலாற்றுகிறோம் என்பதே முக்கியமானது. அந்த வகையில் இதுவரை வெற்றிகரமாக செயல்பட்டு வந்திருக்கிறேன். இனியும் அப்படியே செயலாற்றுவேன் என நம்புகிறேன். ஒரு நல்ல கேப்டனை உருவாக்குவது அணியின் அனைத்து வீரா்களே. ஆஸ்திரேலிய தொடரின் வெற்றி அணியினருக்கு கிடைத்த வெற்றியே.

உண்மையில் இந்திய அணியில் எனக்கான இடம் ஆபத்தில் இருப்பதாக எப்போதுமே நான் உணா்ந்ததில்லை. கேப்டனும், அணி நிா்வாகமும் என் மேல் நம்பிக்கை வைத்துள்ளனா். ஏதேனும் ஒரு ஆட்டத்தில் ஒரு வீரா் தடுமாறும்போது அவா் முற்றிலுமாக வீழ்ந்துவிட்டாா் என்று அா்த்தம் இல்லை. நான் தடுமாறிய நேரங்களில் கேப்டன் எனக்கு ஆதரவு அளித்துள்ளாா் என்று ரஹானே கூறினாா்.