செய்திகள்

பரபரப்பான டி20 ஆட்டத்தில் மே.இ. தீவுகள் அணியைத் தோற்கடித்த நியூசிலாந்து

27th Nov 2020 05:04 PM

ADVERTISEMENT

 

டி20 தொடரின் முதல் ஆட்டத்தில் மே.இ. தீவுகள் அணியை 5 விக்கெட் வித்தியாசத்தில் தோற்கடித்துள்ளது நியூசிலாந்து அணி.

நியூசிலாந்தில் மேற்கிந்தியத் தீவுகள், பாகிஸ்தான் ஆகிய இரு அணிகளும் டி20, டெஸ்ட் தொடர்களில் பங்கேற்கின்றன. நியூசிலாந்து - மேற்கிந்தியத் தீவுகள் இடையிலான 3 ஆட்டங்கள் கொண்ட டி20 கிரிக்கெட் தொடா் இன்று முதல் ஆக்லாந்தில் தொடங்கியுள்ளது.

ஆக்லாந்தில் இன்று தொடங்கிய முதல் டி20 ஆட்டத்தில் டாஸ் வென்ற நியூசிலாந்து, பந்துவீச்சைத் தேர்வு செய்தது.

ADVERTISEMENT

மே.இ. தீவுகள் தொடக்க வீரர் பிளெட்சர், 14 பந்துகளில் 3 சிக்ஸர்கள், 3 பவுண்டரிகளுடன் 34 ரன்கள் எடுத்தார். முதல் விக்கெட்டை (பிளெட்சர்) 4-வது ஓவரில் 58 ரன்கள் எடுத்திருந்தபோது இழந்தது மே.இ. தீவுகள் அணி. அடுத்த 5 விக்கெட்டுகளை 1 ரன்னுக்கு இழந்து அதிர்ச்சியளித்தது. ஹெட்மையர், பவல் ரன் எதுவும் எடுக்காமலும் பூரன் 1 ரன்னிலும் கிங் 13 ரன்களிலும் ஆட்டமிழந்தார்கள். இதில் ஃபெர்குசன் 3 விக்கெட்டுகளை எடுத்தார். 

இதன்பிறகு ஜோடி சேர்ந்த ஃபேபியன் ஆலன் - பொலார்ட் சிறப்பாக விளையாடினார்கள். ஃபேபியன் ஆலன் 30 ரன்களில் ஆட்டமிழந்தார். விக்கெட் கீப்பர் பால் ரன் எதுவும் எடுக்காமல் ஆட்டமிழந்தார். 4 ஓவர்கள் வீசி 5 விக்கெட்டுகளை எடுத்தார் ஃபெர்குசன். 

மழை காரணமாக ஆட்டம் 16 ஓவர்களாகக் குறைக்கப்பட்டது. மேற்கிந்தியத் தீவுகள் அணி, 7 விக்கெட் இழப்புக்கு 180 ரன்கள் எடுத்தது. பொலார்ட் 37 பந்துகளில் 8 சிக்ஸர்கள், 4 பவுண்டரிகளுடன் 75 ரன்கள் எடுத்து ஆட்டமிழக்காமல் இருந்தார். டி.எல்.எஸ். முறையில் நியூசிலாந்து அணிக்கு 16 ஓவர்களில் 176 ரன்கள் இலக்கு நிர்ணயிக்கப்பட்டது. 

முதல் ஓவரிலேயே கப்தில் 5 ரன்களுக்கு ஆட்டமிழந்தார். சைஃபர்ட் 17 ரன்களில் ஆட்டமிழந்தார். ஃபேபியன் ஆலன் வீசிய 5-வது ஓவரில் 22 ரன்களை எடுத்தார் பிலிப்ஸ். அடுத்த ஓவரில் அவர் ஆட்டமிழந்தார். 6 ஓவர்களில் 3 விக்கெட் இழப்புக்கு 62 ரன்கள் எடுத்தது நியூசிலாந்து. 

டெய்லர் ரன் எதுவும் எடுக்காமல் வெளியேற, அடுத்து வந்த நீஷம் சிறப்பான டி20 ஆட்டத்தை வெளிப்படுத்தினார். 10 ஓவர்களின் முடிவில் 4 விக்கெட் இழப்புக்கு 118 ரன்கள். நியூசிலாந்தின் வெற்றிக்கு 36 பந்துகளில் 58 ரன்கள் தேவைப்பட்டன. 

கான்வே 29 பந்துகளில் 41 ரன்கள் எடுத்து ஆட்டமிழந்தார். இதன்பிறகு ஜோடி சேர்ந்த நீஷம் - சான்ட்னர் கடைசிவரை ஆட்டமிழக்காமல் இருந்து அணியின் வெற்றிக்கு உதவினார்கள். 15.2 ஓவர்களில் 5 விக்கெட் இழப்புக்கு 179 ரன்கள் எடுத்து நியூசிலாந்து அணி வெற்றி பெற்றது. நீஷம் 24 பந்துகளில் 48 ரன்களும் சான்ட்னர் 18 பந்துகளில் 31 ரன்களும் எடுத்து கடைசிவரை ஆட்டமிழக்காமல் இருந்தார்கள்.

5 விக்கெட்டுகள் எடுத்த ஃபெர்குசன், ஆட்ட நாயகனாகத் தேர்வு செய்யப்பட்டார்.

அடுத்த இரு டி20 ஆட்டங்கள் வரும் 29, 30 ஆகிய தேதிகளில் மௌன்ட் மௌன்கானுய் நகரில் நடைபெறுகின்றன. இரு ஆட்டங்கள் கொண்ட டெஸ்ட் தொடரின் முதல் ஆட்டம் வரும் டிசம்பா் 3-ம் தேதி ஹாமில்டனிலும், 2-வது ஆட்டம் டிசம்பா் 11-ம் தேதி வெலிங்டனிலும் நடைபெறுகிறது.

Tags : New Zealand 5 wickets
ADVERTISEMENT

MORE FROM THE SECTION

ADVERTISEMENT