கொல்கத்தா நைட் ரைடர்ஸின் அசத்தல் பந்துவீச்சால் ராஜஸ்தான் ராயல்ஸ் நிர்ணயிக்கப்பட்ட 20 ஓவர்கள் முடிவில் 9 விக்கெட்டுகள் இழப்புக்கு 137 ரன்கள் மட்டுமே எடுத்து 37 ரன்கள் வித்தியாசத்தில் தோல்வியடைந்தது.

13-வது ஐபிஎல் சீசனின் 12-வது ஆட்டத்தில் இன்று (புதன்கிழமை) ராஜஸ்தான் ராயல்ஸ், கொல்கத்தா நைட் ரைடர்ஸ் அணிகள் விளையாடின. டாஸ் வென்ற ராஜஸ்தான் கேப்டன் ஸ்டீவ் ஸ்மித் முதலில் பந்துவீச்சைத் தேர்வு செய்தார். இதன்படி முதலில் பேட் செய்த கொல்கத்தா நிர்ணயிக்கப்பட்ட 20 ஓவர்கள் முடிவில் 6 விக்கெட்டுகள் இழப்புக்கு 174 ரன்கள் எடுத்தன.

கொல்கத்தா பேட்டிங் விவரம்: கில் மீண்டும் சூப்பர் தொடக்கம்: கொல்கத்தா 174 ரன்கள் குவிப்பு

175 ரன்கள் என்ற வெற்றி இலக்குடன் தொடக்க ஆட்டக்காரர்களாக ஜோஸ் பட்லர் மற்றும் கேப்டன் ஸ்மித் களமிறங்கினர். முதல் 2 ஆட்டங்களில் அரைசதம் அடித்த ஸ்மித் இந்த முறை 3 ரன்கள் மட்டுமே எடுத்த நிலையில் ஆட்டமிழந்தார்.

தொடர்ந்து களமிறங்கிய சாம்சனும் 8 ரன்கள் மட்டுமே எடுத்த நிலையில் ஆட்டமிழந்தார். இந்த சரிவிலிருந்து மீள்வதற்குள் பட்லர் 21 ரன்களுக்கு மவி பந்தில் ஆட்டமிழந்தார்.

ராஜஸ்தானின் பிரதான பேட்ஸ்மேன்கள் சோபிக்கத் தவறியதால் 39 ரன்களுக்குள் 3 விக்கெட்டுகள் என்ற இக்கட்டான நிலையில் தத்தளித்தது ராஜஸ்தான். 8-வது ஓவரை வீசிய நாகர்கோடி, உத்தப்பா மற்றும் பராக் விக்கெட்டை வீழ்த்தி அசத்தினார்.

இதனால், 43 ரன்களுக்குள் 5 விக்கெட்டுகளை இழந்தது ராஜஸ்தான்.

முந்தைய ஆட்டத்தில் ஹீரோவாக ஜொலித்த தெவாதியா இந்த ஆட்டத்தில் 1 சிக்ஸர் மட்டுமே அடித்த நிலையில் 14 ரன்களுக்கு ஆட்டமிழந்தார்.

இதன்பிறகு, விக்கெட்டுகள் மளமளவென சரிந்தன. ஷ்ரேயஸ் கோபால் 5 ரன்கள், ஆர்ச்சர் 6 ரன்கள், உனத்கட் 9 ரன்கள் என அடுத்தடுத்து ஆட்டமிழந்து பெவிலியனுக்குத் திரும்பினர்.

டாம் கரண் மட்டும் விக்கெட்டைப் பறிகொடுக்காமல் கடைசி வரை நின்று விளையாடி கடைசியில் அதிரடி காட்டினார். இதன்மூலம், 35-வது பந்தில் அவர் அரைசதத்தை எட்டினார். எனினும், ராஜஸ்தானால் வெற்றி இலக்கை நெருங்க முடியவில்லை.

நிர்ணயிக்கப்பட்ட 20 ஓவர்கள் முடிவில் ராஜஸ்தான் அணி 9 விக்கெட்டுகள் இழப்புக்கு 137 ரன்கள் எடுத்தது. டாம் கரண் இறுதிவரை ஆட்டமிழக்காமல் 54 ரன்கள் எடுத்தார். 

இதன்மூலம், கொல்கத்தா அணி 37 ரன்கள் வித்தியாசத்தில் வெற்றி பெற்றது.

ராஜஸ்தான் அணிக்கு நடப்பு சீசனில் இதுவே முதல் தோல்வி.