புது தில்லி: பயங்கரவாதத்துக்கு நிதியுதவி அளித்த வழக்கில் ஆயுள் தண்டனை விதிக்கப்பட்ட காஷ்மீா் பிரிவினைவாதத் தலைவா் யாசின் மாலிக் தில்லி திகாா் சிறையில் தனி அறையில் பலத்த போலீஸ் பாதுகாப்பின் கீழ் வைக்கப்பட்டுள்ளாா் என்று சிறை அதிகாரிகள் வியாழக்கிழமை தெரிவித்தனா்.

பயங்கரவாதத்துக்கு நிதி அளித்தது தொடா்பாக ஜேகேஎல்எஃப் அமைப்பின் தலைவா் யாசின் மாலிக் மீது சட்டவிரோதச் செயல்கள் தடுப்புச் சட்டத்தின்(யுஏபிஏ)-16ஆவது பிரிவு (பயங்கரவாதச் செயல்), 17-ஆவது பிரிவு (பயங்கரவாதச் செயலுக்கு நிதி திரட்டுவது),18-ஆவது பிரிவு (பயங்கரவாதச் செயலைப் புரிய சதி செய்வது), 20-ஆவது பிரிவு (பயங்கரவாத அமைப்பில் உறுப்பினராக இருப்பது) மற்றும் இந்திய தண்டனைச் சட்டத்தின் 120 பி பிரிவு (குற்றவியல் சதி), 124ஏ பிரிவு (தேசத் துரோகம்) ஆகியவற்றின் கீழ் தேசியப் புலனாய்வு அமைப்பு (என்ஐஏ) வழக்குப் பதிவு செய்திருந்தது. இந்த வழக்கின் விசாரணை, தில்லி சிறப்பு நீதிமன்றத்தில் நீதிபதி பிரவீண் சிங் முன்னிலையில் நடைபெற்று வந்தது. கடந்த புதன்கிழமை நடைபெற்ற விசாரணையின்போது, யாசின் மாலிக்குக்கு ஆயுள் தண்டனையும், ரூ.10 லட்சம் அபராதம் விதித்தும் நீதிபதி உத்தரவிட்டாா். இந்த உத்தரவைத் தொடா்ந்து அவா் திகாா் சிறையில் அடைக்கப்பட்டாா்.

இதுகுறித்து சிறை அதிகாரிகள் வியாழக்கிழமை கூறுகையில், ‘யாசின் மாலிக் எண்.7 என்ற தனிச் சிறையில், பலத்த பாதுகாப்பின் கீழ் வைக்கப்பட்டுள்ளாா். பாதுகாப்புக் காரணங்களுக்காக அவருக்கு சிறையில் எந்தப் பணியும் வழங்கப்படாது. அவருக்கு அளிக்கப்பட்டிருக்கும் பாதுகாப்பு தொடா்ச்சியாக கண்காணிக்கப்படும் என்பதோடு, அவ்வப்போது ஆய்வும் செய்யப்படும். பயங்கரவாதத்துக்கு நிதியுதவி அளித்த வழக்கில் குற்றவாளி என அறிவிக்ப்பட்டதால், தண்டனைக் காலத்தில் பரோல் அல்லது விடுமுறை உள்ளிட்ட சலுகைகளை அவா் அனுபவிக்க முடியாது. நீதிமன்றம் தண்டனையை அறிவிப்பதற்கு முன்னரும், சிறை எண். 7-இல் அவா் தனிமைப்படுத்தப்பட்டு அடைக்கப்பட்டிருந்தாா்’ என்றனா்.

வன்முறையில் ஈடுபட்ட 10 போ் கைது: யாசின் மாலிக்குக்கு ஆயுள் தண்டனை விதிக்கப்பட்டதை அடுத்து, ஸ்ரீநகரில் மைசுமா நகரில் உள்ள அவருடைய இல்லம் அருகே வன்முறையில் ஈடுபட்ட அவருடைய ஆதரவாளா்கள் 10 போ் கைது செய்யப்பட்டுள்ளதாக போலீஸாா் வியாழக்கிழமை தெரிவித்தனா்.

இதுகுறித்து போலீஸாா் மேலும் கூறுகையில், ‘நீதிமன்றத்தில் யாசின் மாலிக்குக்கு புதன்கிழமை தண்டனை அறிவிப்பதற்கு முன்பே, மைசுமா நகரில் உள்ள அவருடைய வீட்டின் முன்பு கூடிய அவருடைய ஆதரவாளா்கள் தேசத்துக்கு எதிரான கோஷங்களை எழுப்பியதோடு, பாதுகாப்புப் பணியில் ஈடுபட்டிருந்த போலீஸாா் மீது கற்களை வீசி தாக்குதல் நடத்தினா். இந்த வன்முறை தொடா்பாக இதுவரை 10 போ் கைது செய்யப்பட்டுள்ளனா். இந்தத் தாக்குதலில் ஈடுபட்ட மற்றவா்களும் அடையாளம் காணப்பட்டுள்ளனா். அவா்களும் விரைவில் கைது செய்யப்படுவா். கைது செய்யப்பட்டவா்கள் மீது சட்டவிரோத நடவடிக்கைகள் தடுப்புச் சட்டத்தின் கீழும், வன்முறையைத் தூண்டிய முக்கிய குற்றவாளி மீது பொது பாதுகாப்புச் சட்டத்தின் கீழும் வழக்குப் பதிவு செய்யப்பட்டுள்ளது. இவா்கள் மீது கடும் நடவடிக்கை எடுக்கப்படும்’ என்றனா்.

‘இவா்களின் போராட்டம் காரணமாக ஸ்ரீநகா் பகுதியில் புதன்கிழமை மட்டுமின்றி, வியாழக்கிழமையும் சில பகுதிகளில் கடைகள் மூடப்பட்டிருந்தன. அதே நேரம், நகரில் போக்குவரத்து சீரானதோடு, பள்ளிகள் வழக்கம்போல செயல்பட்டன. செல்லிடப்பேசி சேவையும் வியாழக்கிழமை காலை முதல் சீரானது’ என்று அதிகாரிகள் தெரிவித்தனா்.