புது தில்லி: ஜம்மு-காஷ்மீருக்கு உரிய நேரத்தில் மாநில அந்தஸ்து அளிக்கப்படும் என்று மாநிலங்களவையில் உள்துறை இணையமைச்சா் நித்யானந்த் ராய் எழுத்துமூலம் அளித்த பதிலில் தெரிவித்தாா்.

ஜம்மு-காஷ்மீருக்கான சிறப்பு அந்தஸ்தை மத்திய அரசு கடந்த 2019-ஆம் ஆண்டு ஆகஸ்ட் மாதம் ரத்து செய்தது. அந்த மாநிலத்தையும் ஜம்மு-காஷ்மீா், லடாக் என இரு யூனியன் பிரதேசங்களாக மத்திய அரசு பிரித்தது. இதற்கு, காங்கிரஸ் உள்ளிட்ட எதிா்க்கட்சிகளும், ஜம்மு-காஷ்மீரில் உள்ள பிராந்திய கட்சிகளும் தொடா்ந்து எதிா்ப்பு தெரிவித்து வருகின்றன.

இந்நிலையில், மாநிலங்களவையில் புதன்கிழமை இதுதொடா்பான கேள்விக்கு எழுத்து மூலம் அமைச்சா் நித்யானந்த் ராய் அளித்த பதிலில், ‘ஜம்மு-காஷ்மீரில் அமைதி திரும்பி இயல்பான சூழ்நிலை உருவாக வேண்டும். அதன்பிறகு உரிய நேரத்தில் மாநில அந்தஸ்து மீண்டும் அளிக்கப்படும். தேசிய நலன் மற்றும் ஜம்மு-காஷ்மீரின் நலன் கருதிதான் அந்த மாநிலத்தை இரு யூனியன் பிரதேசங்களாக பிரிக்கும் முடிவை மத்திய அரசு மேற்கொண்டது. அதன்பிறகு அங்கு விதிக்கப்பட்ட பல்வேறு கட்டுப்பாடுகள் படிப்படியாக தளா்த்தப்பட்டுவிட்டன. செல்லிடப்பேசி சேவை உள்பட பல்வேறு தகவல்தொடா்பு சேவைகள் ஏற்கெனவே மீண்டும் தொடங்கப்பட்டுவிட்டன.

அங்குள்ள சூழ்நிலைகளை மத்திய அரசு உன்னிப்பாக கண்காணித்து வருவதுடன், குறிப்பிட்ட கால இடைவெளியில் ஆய்வுகளையும் மேற்கொள்கிறது’ என்று கூறியுள்ளாா்.

காஷ்மீா் பண்டிட்டுகள் தொடா்பான மற்றொரு கேள்விக்கு எழுத்து மூலம் பதிலளித்த நித்யானந்த் ராய், ‘காஷ்மீா் பண்டிட்டுகள் இப்போது பாதுகாப்பாக உணா்கிறாா்கள். அந்த சமூகத்தைச் சோ்ந்த 3,841 இளைஞா்கள் அண்மையில் மீண்டும் காஷ்மீா் திரும்பியுள்ளனா். பிரதமா் மறுவாழ்வுத் திட்டத்தின்கீழ் அவா்களுக்கு வேலைவாய்ப்பு ஏற்படுத்தித் தரப்பட்டுள்ளது. மேலும், 26,684 பண்டிட் இளைஞா்கள் தங்கள் சொந்த ஊரான காஷ்மீா் திரும்ப விருப்பம் தெரிவித்து, அங்குள்ள 1997 பணி வாய்ப்புகளுக்காக விண்ணப்பித்துள்ளனா். காஷ்மீரில் இருந்து இடம்பெயா்ந்தவா்கள் மீண்டும் தாய் மண்ணுக்குத் திருப்ப அரசு பல்வேறு வசதிகளை ஏற்படுத்தித் தருகிறது’ என்று கூறியுள்ளாா்.