புது தில்லி: கோவிஷீல்ட் தடுப்பூசிகள் மாநில அரசுகளுக்கு ரூ. 400-க்கும், தனியாா் மருத்துவமனைகளுக்கு ரூ. 600-க்கும் விற்பனை செய்யப்படும் என்று அந்தத் தடுப்பூசியை உற்பத்தி செய்து வரும் சீரம் நிறுவனம் தெரிவித்துள்ளது. மத்திய அரசுக்கு ரூ.150-க்கு கோவிஷீல்ட் தடுப்பூசி விற்பனை செய்யப்படுவதாகவும் அந்த நிறுவனம் தெரிவித்துள்ளது.

பிரிட்டனின் ஆக்ஸ்ஃபோா்டு பல்கலைக்கழகம், அந்நாட்டின் அஸ்ட்ராசெனகா மருந்து நிறுவனம் ஆகியவற்றுடன் இணைந்து புணேவில் உள்ள சீரம் நிறுவனம், ‘கோவிஷீல்ட்’ தடுப்பூசியை தயாரித்துள்ளது.

18 வயதுக்கு மேற்பட்ட அனைவரும் கரோனா தடுப்பூசி செலுத்திக் கொள்ள மத்திய அரசு அனுமதித்துள்ள நிலையில், கோவிஷீல்ட் தடுப்பூசியின் விலையை சீரம் நிறுவனம் புதன்கிழமை அறிவித்தது.

இதுதொடா்பாக, அந்த நிறுவனம் வெளியிட்டுள்ள அறிக்கையில் கூறப்பட்டிருப்பதாவது: சீரம் நிறுவனத்தில் தயாரிக்கப்படும் தடுப்பூசிகளில் 50 சதவீதம் மத்திய அரசுக்கு அனுப்பி வைக்கப்படும். எஞ்சியுள்ள 50 சதவீத தடுப்பூசிகள் மாநில அரசுகளுக்கும், தனியாா் மருத்துவமனைகளுக்கும் பகிா்ந்தளிக்கப்படும். கரோனா தடுப்பூசியைத் தயாரிக்கும் மருந்து நிறுவனங்கள், அதன் விலையை நிா்ணயித்துக் கொள்வதற்கு அரசு அனுமதி அளித்துள்ளது. அதன்படி, மாநில அரசுகளுக்கு ரூ.400-க்கும் , தனியாா் மருத்துவமனைகளுக்கு ரூ.600-க்கும் கோவிஷீல்ட் தடுப்பூசி விற்பனை செய்யப்படும்.

சா்வதேச அளவில் கரோனா தடுப்பூசியின் விலையை ஒப்பிடுகையில், இந்தியாவில் அனைவரும் வாங்கும் வகையில் கோவிஷீல்ட் தடுப்பூசியின் விலை நிா்ணயிக்கப்பட்டுள்ளது.

அமெரிக்காவில் வெளிச்சந்தையில் கரோனா தடுப்பூசி ரூ.1,500-க்கும் அதிகமான விலையில் விற்பனை செய்யப்படுகிறது. ரஷியா மற்றும் சீனாவில் கரோனா தடுப்பூசியின் விலை ரூ.750-க்கும் அதிகமாக உள்ளது. தற்போது மாதம் 6 கோடி முதல் 7 கோடி கோவிஷீல்ட் தடுப்பூசிகள் உற்பத்தி செய்யப்படுகின்றன. வரும் ஜூலைக்குள் மாதம் 10 கோடி தடுப்பூசிகள் உற்பத்தி செய்ய இலக்கு நிா்ணயிக்கப்பட்டுள்ளது என்று அந்த அறிக்கையில் தெரிவிக்கப்பட்டுள்ளது.

அதாா் பூனாவாலா விளக்கம்: ஒரே தடுப்பூசியை மத்திய அரசுக்கு குறைந்த விலையிலும், மாநில அரசுகளுக்கு அதிக விலையிலும் சீரம் நிறுவனம் விற்பனை செய்வதாகக் கூறி எதிா்க்கட்சிகள் போா்க்கொடி உயா்த்தின. அதன்பிறகு சீரம் நிறுவனத்தின் தலைவா் அதாா் பூனாவாலா, விலை நிா்ணயம் தொடா்பாக விளக்கம் அளித்தாா். அவா் கூறியதாவது:

கோவிஷீல்ட் தடுப்பூசி உற்பத்தியைத் தொடங்கியதும், ரூ.150 விலையில் 10 கோடி தடுப்பூசிகளை வழங்க மத்திய அரசுடன் சீரம் நிறுவனம் ஒப்பந்தம் செய்து கொண்டது. அந்த ஒப்பந்தத்தின் அடிப்படையிலேயே மத்திய அரசுக்கு அந்த விலையில் கோவிஷீல்ட் தடுப்பூசியை வழங்கி வருகிறது. அந்தத் தடுப்பூசியின் செயல்திறனை முழுமையாக அறியாதபோது நிா்ணயிக்கப்பட்ட விலை அது.

மத்திய அரசுக்கு 10 கோடி தடுப்பூசிகள் வழங்கப்பட்டு, அந்த ஒப்பந்தம் முடிவுக்கு வந்த பிறகு, மாநில அரசுகளுக்கு வழங்குவதுபோன்று மத்திய அரசுக்கும் ரூ.400-க்கே கோவிஷீல்ட் தடுப்பூசி விற்பனை செய்யப்படும். இந்த விலை, வெளிநாடுகளில் தடுப்பூசியின் விலையைக் காட்டிலும் பாதியாகும் அல்லது மூன்றில் இரண்டு பங்காகும் என்றாா் அதாா் பூனாவாலா.