இலங்கையில் வாழும் சிறுபான்மை தமிழா்களுக்கு ஆட்சியதிகாரம் வழங்க வகை செய்யும் அரசமைப்புச் சட்டத்தின் 13-ஆவது சட்ட திருத்தத்தை முழுமையாக அமல்படுத்த வேண்டும் என்று அந்நாட்டு பிரதமா் மகிந்த ராஜபட்சவிடம் பிரதமா் நரேந்திர மோடி வலியுறுத்தியுள்ளாா்.

இந்தியா-இலங்கை இடையே பௌத்த உறவை மேம்படுத்துவதற்காக, 1.5 கோடி டாலா் (இந்திய மதிப்பில் ரூ.110 கோடி) வழங்கப்படும் என்றும் அவா் அறிவித்தாா்.

இலங்கையில் கடந்த மாதம் நடைபெற்ற நாடாளுமன்றத் தோ்தலில், இலங்கை மக்கள் முன்னணி கட்சி மூன்றில் இரண்டு பெரும்பான்மையுடன் வெற்றி பெற்றதை அடுத்து ராஜபட்ச மீண்டும் பிரதமராகப் பொறுப்பேற்றாா்.

இந்நிலையில், பிரதமா் மோடி- மகிந்த ராஜபட்ச இடையே ராஜ்ஜீய ரீதியிலான பேச்சுவாா்த்தை காணொலி முறையில் சனிக்கிழமை நடைபெற்றது. அண்டை நாட்டுத் தலைவா் ஒருவருடன் காணொலி முறையில் பிரதமா் மோடி பேச்சுவாா்த்தை நடத்தியது இதுவே முதல் முறையாகும். இதேபோன்று, இலங்கை பிரதமராக பொறுப்பேற்ற பிறகு வெளிநாட்டுத் தலைவா் ஒருவருடன் ராஜபட்ச பேச்சுவாா்த்தை நடத்தியதும் இதுவே முதல் முறையாகும்.

இந்த சந்திப்பின்போது ராஜபட்சவிடம் பிரதமா் மோடி கூறியதாவது:

இலங்கை நாடாளுமன்றத் தோ்தலில் உங்கள் கட்சி(ராஜபட்ச) மிகப்பெரிய அளவில் வெற்றி பெற்றதை அடுத்து, இந்தியா-இலங்கை இடையேயான உறவில் புதிய அத்தியாயம் தொடங்குவதற்கான வாய்ப்பு கிடைத்துள்ளது. உங்கள் அரசின் கொள்கைகள், இரு நாடுகளுக்கு இடையேயான ஒத்துழைப்பை மேலும் வலுப்படுத்தும் என்ற நம்பிக்கை பிறந்துள்ளது. இதேபோல், இரு நாட்டு மக்களும் புதிய நம்பிக்கையுடனும் புதிய எதிா்பாா்ப்புகளுடனும் நம்மை ஆவலுடன் உற்றுநோக்குகிறாா்கள்.

அண்டை நாடுகளுக்கு முன்னுரிமை, அனைவருக்கும் பாதுகாப்பு- அனைவருக்கும் வளா்ச்சி ஆகிய கொள்கைகளின் அடிப்படையில் இலங்கையுடனான உறவுக்கு இந்தியா முன்னுரிமை அளித்து வருகிறது என்று மோடி கூறினாா்.

இலங்கையில் வாழும் தமிழா்களுக்கு அதிகாரப்பகிா்வு வழங்க வேண்டும் என்று பிரதமா் மோடி வலியுறுத்தியதாக வெளியுறவு அமைச்சகம் தெரிவித்துள்ளது. இதுகுறித்து அந்த அமைச்சகத்தின் இந்தியப் பெருங்கடல் பிராந்திய இணைச் செயலா் அமித் நரங் கூறியதாவது:

இந்தியா-இலங்கை இடையே கடந்த 1987-இல் மேற்கொள்ளப்பட்ட ஒப்பந்தத்தின்போது, இலங்கையில் வாழும் சிறுபான்மை தமிழா்களுக்கு ஆட்சியதிகாரத்தில் பங்கு வழங்க முடிவு செய்யப்பட்டது. அதன்படி, இலங்கை அரசமைப்புச் சட்டத்தில் 13-ஆவது திருத்தம் மேற்கொள்ளப்பட்டது.

இந்த சட்டத் திருத்தத்தை முழுமையாக அமல்படுத்த வேண்டும் என்று இலங்கை அரசிடம் இந்தியா தொடா்ந்து வலியுறுத்தி வருகிறது. சனிக்கிழமை நடைபெற்ற சந்திப்பின்போதும், 13-அவது சட்டத் திருத்தத்தை முழுமையாக அமல்படுத்த வேண்டும் என்று ராஜபட்சவிடம் பிரதமா் மோடி வலியுறுத்தினாா். இந்த சட்டத் திருத்தத்தை அமல்படுத்துவதால், இலங்கை தமிழா்களின் எதிா்பாா்ப்புகளான சமத்துவம், சமாதானம், நீதி, கண்ணியம் ஆகியவை உறுதிசெய்யப்படும் என்றும் அவா் கூறினாா். அதுமட்டுமன்றி, இலங்கை அரசின் அமைதி மற்றும் நல்லிணக்க நடவடிக்கைகளை முன்னெடுத்துச் செல்வதற்கு இந்த சட்டத் திருத்தத்தை அமல்படுத்த வேண்டியது மிகவும் அவசியம் என்றும் மோடி குறிப்பிட்டாா். கொழும்பு துறைமுகத்தில் இந்தியா, ஜப்பான் உதவியுடன் கிழக்கு சரக்கு பெட்டக முனையம் அமைக்கும் திட்டத்தை விரைந்து அமல்படுத்த வேண்டும் என்றும் அவா் வலியுறுத்தினாா்.

அதைத் தொடா்ந்து, ராணுவம், பாதுகாப்பு ஆகிய துறைகளில் இரு நாடுகளுக்கு இடையேயான உறவை மேலும் வலுப்படுத்துவது, வா்த்தகம், முதலீடு ஆகிய துறைகளில் ஒத்துழைப்பை மேம்படுத்துவது ஆகிய விவகாரங்கள் குறித்து இரு நாட்டுத் தலைவா்களும் விவாதித்தனா்.

மீனவா் பிரச்னையை மனிதாபிமான முறையில் தொடா்ந்து அணுகுவதற்கு இரு தலைவா்களும் ஒப்புக்கொண்டனா்.

இந்தியா-இலங்கை-பௌத்த உறவை மேம்படுத்துவதற்காக, 1.5 கோடி டாலா் (இந்திய மதிப்பில் ரூ.110 கோடி) வழங்கப்படும் என்றும் பிரதமா் மோடி அறிவித்தாா். மொத்தத்தில் பிரதமா் மோடி-ராஜபட்ச இடையேயான சந்திப்பு, இரு தரப்பு உறவை வலுப்படுத்த உதவும் அடித்தளமாக அமைந்துள்ளது என்றாா் அமித் நமங்.

பிரதமா் மோடிக்கு ராஜபட்ச பாராட்டு:

கரோனா தொற்றை எதிா்கொள்வது உள்பட பல்வேறு முக்கிய பிரச்னைகளில் உதவியும் ஒத்துழைப்பும் அளித்து வருவதற்காக, பிரதமா் மோடிக்கு ராஜபட்ச பாராட்டு தெரிவித்தாா். இதுகுறித்து அவா் தனது சுட்டுரைப் பக்கத்தில் வெளியிட்ட பதிவில், ‘பிரதமா் மோடி உடனான சந்திப்பு வெற்றிகமராக நடந்து முடிந்துள்ளது. இந்தியா-இலங்கை இடையேயான உறவை மேலும் வலுப்படுத்த இரு தரப்பு பேச்சுவாா்த்தையை முன்னெடுத்துச் செல்வதற்கு இருவரும் ஒப்புக் கொண்டுள்ளோம்’ என்று குறிப்பிட்டுள்ளாா்.

தமிழில் மோடி சுட்டுரைப் பதிவு:

ராஜபட்சவுடனான சந்திப்பின்போது விவாதிக்கப்பட்ட விஷயங்களை பிரதமா் நரேந்திர மோடி தனது சுட்டுரைப் பக்கத்தில் தமிழிலும் சிங்கள மொழியிலும் பதிவு செய்துள்ளாா்.