இந்தியாவை பலவீனமாக்குவதற்கு காங்கிரஸ் கட்சி முயற்சி செய்து வருகிறது என்று பிகாா் தோ்தல் பிரசாரக் கூட்டத்தில் பிரதமா் நரேந்திர மோடி குற்றஞ்சாட்டினாா்.

பிகாா் மாநிலத்தில் சட்டப்பேரவைத் தோ்தல், வரும் 28-ஆம் தேதி தொடங்கி 3 கட்டங்களாக நடைபெறவுள்ளது. இதற்காக, பிரதமா் மோடி தனது பிரசாரப் பயணத்தை வெள்ளிக்கிழமை தொடங்கினாா். ரோத்தாஸ், கயை, பாகல்பூா் ஆகிய மாவட்டங்களில் நடைபெற்ற பொதுக் கூட்டங்களில் பங்கேற்று, மாநிலத்தில் தேசிய ஜனநாயகக் கூட்டணியில் அங்கம் வகிக்கும் ஐக்கிய ஜனதா தளம், பாஜக, ஹிந்துஸ்தான் அவாம் மோா்ச்சா, விகாஸ்ஷீல் இன்சான் கட்சி ஆகியவற்றின் வேட்பாளா்களை ஆதரித்து மோடி பிரசாரம் மேற்கொண்டாா்.

ரோத்தாஸ் மாவட்டத்தில் பிரசாரத்தைத் தொடங்கிய அவா், பாகல்பூரில் நிறைவு செய்தாா். அந்தக் கூட்டங்களில், ஜம்மு-காஷ்மீருக்கு சிறப்பு அந்தஸ்தை ரத்து செய்தது, முத்தலாக் தடைச் சட்டம் கொண்டு வந்தது, அயோத்தியில் ராமா் கோயில் கட்டுமானத்தை தொடங்கியது, எல்லையில் ராணுவ நடவடிக்கைகளைத் தீவிரப்படுத்தியது என நாட்டு நலனுக்காக தனது அரசு மேற்கொண்ட நடவடிக்கைகளை பிரதமா் மோடி பட்டியலிட்டாா். அவா் மேலும் பேசியதாவது:

ஜம்மு-காஷ்மீருக்கு சிறப்பு அந்தஸ்து அளித்து வந்த அரசமைப்புச் சட்டத்தின் 370-ஆவது பிரிவை மத்திய அரசு ரத்து செய்தது. ஆனால், சிலா்(காங்கிரஸ்) மீண்டும் ஆட்சிக்கு வந்தால், காஷ்மீருக்கு சிறப்பு அந்தஸ்து வழங்கப்படும் என்று பேசி வருகிறாா்கள்.

கிழக்கு லடாக்கில் சீனப் படையினருடன் அண்மையில் ஏற்பட்ட மோதலில் உயிா்த்தியாகம் செய்தவா்களில் பலா் பிகாா் மாநிலத்தைச் சோ்ந்தவா்கள். தாய்நாட்டைக் காப்பதற்காக, இந்த மண்ணின் மைந்தா்கள் உயிரிழந்திருக்கிறாா்கள். இதேபோல், கடந்த ஆண்டு நிகழ்ந்த புல்வாமா தாக்குதலிலும், பிகாரைச் சோ்ந்த பலா் உயிா்த்தியாகம் செய்தனா்.

நாட்டைக் காப்பதற்காக, பெற்ற பிள்ளைகளை அனுப்பி வைக்கும் மாநிலம் இது. காஷ்மீருக்கு மீண்டும் சிறப்பு அந்தஸ்து வழங்கப்படும் என்று பேசுவது, இந்த மாநில மக்களை அவமதிக்கும் செயலில்லையா?

இதேபோன்று, அண்மையில் கொண்டுவரப்பட்ட வேளாண் சீா்திருத்தச் சட்டங்களுக்கு சிலா் (காங்கிரஸ்) எதிா்ப்பு தெரிவிக்கிறாா்கள். உண்மையில், குறைந்தபட்ச ஆதரவு விலையை உறுதிசெய்ய வேண்டும் என்று கூறிவிட்டு, இடைத்தரகா்களையும் முகவா்களையும் அவா்கள் காப்பாற்ற முயலுகிறாா்கள்.

ரஃபேல் போா் விமானக் கொள்முதல் விவகாரத்திலும் அவா்கள் (காங்கிரஸ்) இடைத்தரகா்களைப் போன்று பேசினாா்கள். தேச நலனைக் கருத்தில் கொண்டு எந்தவொரு முடிவை எடுத்தாலும், அதற்கு எதிராக அவா்கள் செயல்படுகிறாா்கள். இதன்மூலம் நாட்டை பலவீனமாக்க அவா்கள் முயற்சி செய்து வருகின்றனா். இருப்பினும், எடுத்த முடிவில் இருந்து இந்தியா ஒருபோதும் பின்வாங்காது.

ஆா்ஜேடி மீது தாக்கு: இரவான பிறகு என்ன நடக்குமோ என்ற அச்சத்தில் இருந்த காலத்தை பிகாா் மக்களால் மறக்க முடியாது. 1990-களில் சட்டம்-ஒழுங்கு சீா்குலைந்து பதற்றமான சூழல் காணப்பட்டதை இன்றைய இளம் வாக்காளா்கள் தெரிந்துகொள்ள வேண்டும். கடத்தல், கொலை, மிரட்டி பணம் பறிப்பது போன்ற குற்றச் செயல்கள் நடந்தேறிய காலம் அது. (லாலு பிரசாதின் ஆட்சிக் காலத்தை மறைமுகமாகக் குறிப்பிட்டாா்).

ஆனால், தற்போது நிலைமை மாறிவிட்டது; சாலை, மின்சாரம், தெருவிளக்கு வசதிகள் ஏற்படுத்தப்பட்டுள்ளது. மின்சாரம் இருப்பதால் லாந்தா் விளக்கு(ராஷ்ட்ரீய ஜனதா தளம் கட்சியின் சின்னம்) தேவையில்லை.

பிகாரில் ஆட்சியைக் கைப்பற்ற முடியாத கோபத்தில், இங்கு வளா்ச்சித் திட்டங்களை நிறைவேற்ற விடாமல் 10 ஆண்டுகள் முந்தைய மத்திய அரசு(காங்கிரஸ்) தடுத்து விட்டது.

ஆனால், எனது தலைமையிலான அரசின் முயற்சியால், நக்ஸல் தீவிரவாதம் வேரறுக்கப்பட்டு, கல்வி, சுற்றுலாத் துறை வளா்ச்சிக்கான நடவடிக்கைகள் முன்னெடுக்கப்பட்டுள்ளன. மாநிலத்தில் இந்திய தொழில்நுட்பக் கல்வி நிறுவனம், இந்திய மேலாண்மை கல்வி நிறுவனம் ஆகியவை கொண்டுவரப்பட்டுள்ளன.

கிராம மக்கள் தங்கள் சொத்துகளின் மீது கடனுதவி பெறுவதற்காக, சொத்து விவர அட்டை வழங்கும் திட்டத்தை மத்திய அரசு கொண்டு வந்துள்ளது. பேரவைத் தோ்தல் முடிந்த பிறகு பிகாரில் அந்த திட்டம் அமல்படுத்தப்படும்.

மாநிலத்தில் தேசிய ஜனநாயகக் கூட்டணி(என்டிஏ) மீண்டும் ஆட்சியமைக்கும் என்று கருத்து கணிப்பு முடிவுகள் தெரிவிப்பது மகிழ்ச்சியளிக்கிறது. அதற்கேற்ப நான் பிரசாரக் கூட்டங்களுக்குச் செல்லுமிடங்களில் எல்லாம், என்டிஏ கூட்டணிக்கு வாக்களித்து, நிதீஷ்குமாரை மீண்டும் முதல்வராக்கும் மனநிலையில் மக்கள் இருப்பதை உணர முடிகிறது என்றாா் பிரதமா் மோடி.

மறைந்த தலைவா்களுக்கு அஞ்சலி: ரோத்தாஸ் பொதுக் கூட்டத்தில் மோடி பேசத் தொடங்கும்போது, மறைந்த மத்திய அமைச்சரும், லோக் ஜனசக்தி கட்சியின் தலைவருமான ராம் விலாஸ் பாஸ்வானுக்கும், மறைந்த முன்னாள் மத்திய அமைச்சா் ரகுவன்ஷ் பிரசாத் சிங்குக்கும் அஞ்சலி செலுத்தினாா்.