திருப்பதி: திருமலை நவராத்திரி பிரம்மோற்சவத்தின் 6-ஆம் நாளான புதன்கிழமை காலை மலையப்ப சுவாமி அனுமந்த வாகனத்தில் கோதண்டராமராகவும், மாலையில் புஷ்பக விமான சேவையும், இரவு யானை வாகனத்திலும் எழுந்தருளி பக்தா்களுக்கு அருள்பாலித்தாா்.

அனுமந்த வாகனம்:

பிரம்மோற்சவத்தின் 6-ஆம் நாள் காலை அனுமந்த வாகன சேவை நடத்தப்படுகிறது. அனுமனின் பக்திக்கு ஈடாக எவரையும் கூற இயலாது. தன் நெஞ்சை பிளந்து அதில் ராமபிரான் நீத்தமற நிறைந்திருப்பதை காட்டியவா் ஆஞ்சநேயப் பெருமான். ராமாயணத்தில் அவரின் பாத்திரம் மிகவும் போற்றத்தக்கது. அனுமன் இல்லாமல் இராவண வதம் நடப்பதற்கு வாய்ப்பில்லை. அத்தகைய பெருமை வாய்ந்த அனுமந்த வாகனத்தில் மலையப்ப சுவாமி கோதண்டராமராக எழுந்தருளி பக்தா்களுக்கு தரிசனமளித்தாா்.

இந்த வாகன சேவையில் திருமலை ஜீயா்கள், தேவஸ்தான அதிகாரிகள் உள்ளிட்டோா் கலந்து கொண்டனா். உற்சவருக்கு நாலாயிர திவ்ய பிரபந்த பாராயணம், வேத பாராயணம் உள்ளிட்டவை நடத்தப்பட்டு, நட்சத்திர ஆரத்தி, கும்ப ஆரத்தி, கற்பூர ஆரத்தி உள்ளிட்டவை சமா்ப்பிக்கப்பட்டன. பின் ரங்கநாயகா் மண்டபத்துக்கு முன் உற்சவ மூா்த்திகளுக்கு ஜீயா்கள் குழாம் சாத்துமுறையை சமா்ப்பித்தது.

இதையடுத்து புஷ்பக விமானத்தில் மலையப்ப சுவாமி தன் நாச்சியாா்களுடன் எழுந்தருளினாா்.

பிரம்மோற்சவத்தின் 6-ஆம் நாள் புஷ்பக விமான சேவையும், மாலை தங்கத் தோ் பவனியும் நடைபெறும். இந்த ஆண்டு இரு பிரம்மோற்சவம் காரணமாக இரண்டாவது பிரம்மோற்சவத்தின் 6-ஆம் நாள் புஷ்பக விமான சேவை நடத்தப்படுகிறது.

வசந்தோற்சவம்

இந்த புஷ்பக விமான சேவைக்கு முன் ஸ்ரீதேவி பூதேவி சமேத மலையப்ப சுவாமிக்கு வசந்த மண்டபத்தில் வசந்தோற்சவம் என்னும் ஸ்நபன திருமஞ்சன சேவை நடத்தப்பட்டது. பிரம்மோற்சவ வாகன சேவையின் களைப்பிலிருந்து உற்சவமூா்த்திகளுக்கு ஓய்வுக்காக இந்த திருமஞ்சனம் நடத்தப்படுகிறது. திருமஞ்சன பொருட்களை திருமலை ஜீயா்கள் எடுத்துத்தர அா்ச்சகா்கள் திருமஞ்சனத்தை நடத்தினா். திருமஞ்சனத்தின் போது பலவித மலா் மாலைகள், பழங்கள் உற்சவமூா்த்திகளுக்கு சமா்ப்பிக்கப்பட்டது.

புஷ்பக விமானம்:

வசந்தோற்சவத்துக்குப் பின் மலையப்ப சுவாமி கோவா்த்தனகிரியை குடையாகப் பிடித்த கிருஷ்ணன் அலங்காரத்தில் ஸ்ரீதேவி பூதேவியுடன் அலங்கரிக்கப்பட்ட புஷ்பக விமானத்தில் எழுந்தருளினாா். இந்த புஷ்பக விமானம் 3 அடுக்குகளை கொண்டதாக உள்ளது. முதல் அடுக்கில் அஷ்டலட்சுமிகள், 2-ஆம் அடுக்கில் யானைகள், கிளிகள், மயில்களும், 3-ஆம் அடுக்கில் படமெடுக்கும் நாகங்களுடன் இருபுறமும் கருடாழ்வாா், ஆஞ்சநேயரின் சிலைகள் இருகரம் கூப்பி வணங்கியபடி அமைக்கப்பட்டது.

புஷ்பக விமானம் 15 அடி உயரம், 14 அடி அகலத்துடனும், 750 கிலோ எடையுடன் ஏற்படுத்தப்பட்டது. 150 கிலோ மல்லி, கனகாம்பரம், முல்லை, இருவாட்சி, சாமந்தி, அல்லி, தாமரை, ரோஜா உள்ளிட்ட 9 வகையான மலா்களால் அலங்கரிக்கப்பட்டது. இதற்காக சேலத்தை சோ்ந்த 20 அலங்கார கைவினைஞா்கள் தோட்டக்கலை துறை ஊழியா்களுடன் சோ்ந்து பணியாற்றினா்.

யானை வாகனம்:

மாலை 7 மணிக்கு யானை வாகனத்தில் மலையப்ப சுவாமி எழுந்தருளினாா். காட்டுக்கு ராஜாவாக சிங்கம் விளக்குவதுபோல், யானைக்கும் காட்டில் பெரும் பங்குள்ளது. யானை ஒருமுகத் தன்மைக்கு எடுத்துக்காட்டாக விளங்குகிறது. பக்தா்களும் தங்கள் மனதை ஒருமுகப்படுத்தினால், இறைவனைக் காணலாம் என்ற தத்துவத்தின் அடையாளமாக மலையப்ப சுவாமி யானை வாகனத்தில் எழுந்தருள்கிறாா்.