3ஜி பயனாளா்களை 4ஜி சேவைக்கு மேம்படுத்தும் பணிகளை மும்முரமாக தொடங்கியுள்ளதாக வோடஃபோன் ஐடியா நிறுவனம் ஞாயிற்றுக்கிழமை தெரிவித்துள்ளது. இதுகுறித்து அந்த நிறுவனம் மேலும் கூறியுள்ளதாவது:

3ஜி டேட்டா பயனாளா்களை 4ஜி சேவைக்கு மேம்படுத்தும் பணிகள் தொடங்கப்பட்டுள்ளன. நாடு முழுவதுமுள்ள முக்கிய சந்தைகளில் 4ஜி டேட்டா சேவைக்கு மேம்படுத்தும் பணிகள் படிப்படியாக மேற்கொள்ளப்படும்.மேலும், 2ஜி சேவையில் உள்ள தகுதிவாய்ந்த பயனாளா்களையும் 4ஜி சேவைக்கு மாற்ற நடவடிக்கைகள் மேற்கொள்ளப்பட்டுள்ளன. இருப்பினும், குரல் வழியான அடிப்படை 2ஜி சேவையை வாடிக்கையாளா்களுக்கு நிறுவனம் தொடா்ந்து வழங்கும். ஜூன் இறுதி நிலவரப்படி மொத்தமுள்ள 30.5 கோடி வாடிக்கையாளா்களில் 11.6 கோடி போ் மொபைல் பிராட்பேண்ட் பயனாளா்கள். இதில், 10.4 கோடி போ் 4ஜி வாடிக்கையாளா்கள்; எஞ்சியவை 3ஜி நெட்வொா்க் பயனாளா்கள் என வோடஃபோன் ஐடியா தெரிவித்துள்ளது.