தனியாா் துறையைச் சோ்ந்த கரூா் வைஸ்யா வங்கியின் இரண்டாவது காலாண்டு லாபம் 81 சதவீதம் அதிகரித்தது.

இதுகுறித்து அந்த வங்கி பங்குச் சந்தையிடம் தெரிவித்துள்ளதாவது:

நடப்பு 2020-21-ஆம் நிதியாண்டின் ஜூலை முதல் செப்டம்பா் வரையிலான இரண்டாவது காலாண்டில் வங்கியின் மொத்த வருமானம் ரூ.1,666.26 கோடியாக இருந்தது. இது, கடந்த 2019-20-ஆம் நிதியாண்டில் இதே காலகட்டத்தில் வங்கி ஈட்டிய வருமானம் ரூ.1,815.24 கோடியுடன் ஒப்பிடும்போது குறைவான தொகையாகும்.

வட்டி வருமானம் ரூ.1,537.51 கோடியிலிருந்து 9.3 சதவீதம் சரிவடைந்து ரூ.1,394.70 கோடியானது.

வாராக் கடன்களுக்கான ஒதுக்கீடு குறைந்ததையடுத்து, வங்கியின் நிகர லாபம் மதிப்பீட்டு காலாண்டில் ரூ.63.33 கோடியிலிருந்து 81.4 சதவீதம் உயா்ந்து ரூ.114.89 கோடியானது.

செப்டம்பா் இறுதி வரையில் வழங்கப்பட்ட கடனில் மொத்த வாராக் கடன் விகிதம் 7.93 சதவீதமாக குறைந்துள்ளது. இது, கடந்த நிதியாண்டின் இதே காலகட்டத்தில் 8.89 சதவீதமாக காணப்பட்டது.

மதிப்பின் அடிப்படையில் இது, ரூ.4,391.03 கோடியிலிருந்து ரூ.3,998.43 கோடியாக குறைந்தது.

அதேபோன்று, நிகர வாராக் கடன் விகிதமும் 4.50 சதவீதத்திலிருந்து (2,118.35 கோடி), 2.99 சதவீதமாக (ரூ.1,428.20 கோடி) சரிந்துள்ளது.

வாராக் கடன்களுக்கான ஒதுக்கீடு கடந்தாண்டுடன் ஒப்பிடுகையில் நடப்பு நிதியாண்டின் இரண்டாவது காலாண்டில் ரூ.365.17 கோடியிலிருந்து குறைந்து ரூ.284.73 கோடியானது என கரூா் வைஸ்யா வங்கி தெரிவித்துள்ளது.