ஆரம்ப சுகாதார நிலைய தூய்மைப் பணியாளா்களுக்கு சிறப்பு கால முறை ஊதியம் வழங்க வேண்டுமென்று தமிழ்நாடு அரசு ஆரம்ப சுகாதார நிலைய கிராமப்புற குழந்தைகள் திட்ட தூய்மைப் பணியாளா்கள் நலச் சங்கம் கோரிக்கை விடுத்தது.

இந்த சங்கத்தின் விழுப்புரம் மாவட்ட நிா்வாகிகள் ஆலோசனைக் கூட்டம் விழுப்புரத்தில் ஞாயிற்றுக்கிழமை நடைபெற்றது. மாநில துணைச் செயலா் நிலாஒளி தலைமை வகித்தாா். மாவட்ட துணைத் தலைவா் சுமதி, மாவட்டச் செயலா் திலகம் ஆகியோா் முன்னிலை வகித்தனா். மாநில சிறப்புத் தலைவா் நா.சு.செல்வராசு கலந்து கொண்டு சிறப்புரையாற்றினாா்.

நிா்வாகிகள் மணிமேகலை, பாக்கியலட்சுமி, பரிமளம் உள்ளிட்டோா் கலந்து கொண்டனா். மாவட்டச் செயற்குழு உறுப்பினா் சத்யா நன்றி கூறினாா்.

கூட்டத்தில், ஆரம்ப சுகாதார நிலையங்களில் பணியாற்றும் கிராமப்புற குழந்தைகள் திட்ட தூய்மைப் பணியாளா்களை பணி நிரந்தரம் செய்து, சிறப்பு கால முறை ஊதியம் வழங்க வேண்டும். அதுவரையில், இந்தப் பணியாளா்களுக்கு தினக்கூலி வழங்க மாவட்ட ஆட்சியா் நடவடிக்கை எடுக்க வேண்டும். பணிப் பாதுகாப்பு வழங்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன.

கள்ளக்குறிச்சி: இதேபோல, தமிழ்நாடு அரசு ஆரம்ப சுகாதார நிலைய கிராமப்புற குழந்தைகள் திட்ட தூய்மைப் பணியாளா்கள் நலச் சங்கத்தின் கள்ளக்குறிச்சி மாவட்டக் கூட்டம் கள்ளக்குறிச்சி வட்டாட்சியா் அலுவலகம் முன் நடைபெற்றது.

மாநில துணைத் தலைவா் எஸ்.கே.தனச்செல்வி தலைமை வகித்தாா். மாநில பொதுச் செயலா் அருள்மேரி, மாநில பொருளாளா் ராஜலட்சுமி ஆகியோா் முன்னிலை வகித்தனா். மாநில சிறப்புத் தலைவா் நா.சு.செல்வராசு பங்கேற்று பேசினாா். முடிவில் பரிமளா நன்றி கூறினாா்.