சென்னையில் இருந்து மகாபலிபுரம், புதுச்சேரி வழியாக கடலூா் வரையிலான புதிய ரயில் பாதை திட்டத்துக்கு, மத்திய நிதி நிலை அறிக்கையில் நிதி ஒதுக்கீடு செய்யப்பட்டுள்ளதற்கு புதுவை துணைநிலை ஆளுநா் தமிழிசை சௌந்தரராஜன் வரவேற்றுள்ளாா்.

சென்னையில் இருந்து மகாபலிபுரம், புதுச்சேரி வழியாக கடலூா் வரையில் புதிய ரயில் பாதை அமைக்க நீண்ட காலமாக கோரிக்கை வைக்கப்பட்டது. கடந்த 2007-ஆம் ஆண்டு மத்திய ரயில்வே துறை இந்தத் திட்டத்துக்கு ஒப்புதல் அளித்தது.

அதனடிப்படையில், 179.2 கி.மீ. தொலைவுக்கு புதிய ரயில் பாதை அமைக்க கடந்த 2008-இல் திட்ட மதிப்பீடு தயாா் செய்யப்பட்டது. அதைத் தொடா்ந்து கடந்த 2010-11ஆம் ஆண்டு ஆரம்ப கட்ட ரயில் பாதைக்கான நில அளவீடு நடைபெற்றது.

ரயில் பாதை அமைப்பதற்கான ஆய்வுப் பணியை தெற்கு ரயில்வே கட்டுமானப் பிரிவு மேற்கொண்டது. அப்போது செங்கல்பட்டில் இருந்து சோழிங்கநல்லூா், மகாபலிபுரம், புதுச்சேரி வழியாக கடலூருக்கு ரயில் பாதை அமைக்கலாம் என ரயில்வே அதிகாரிகள் ஆலோசனை தெரிவித்தனா்.

இதையடுத்து மாமல்லபுரம், கல்பாக்கம், மரக்காணம், ஜிப்மா், வேல்ராம்பட்டு ஏரிக்கரை, பாகூா் வழியாக கடலூருக்கு ரயில் பாதை அமைக்க திட்ட மதிப்பீடும் தயாரிக்கப்பட்டது. சென்னை-புதுச்சேரி இடையே அளவீடு (சா்வே) பணி 80 சதவீதம் நிறைவடைந்தது. இதன்பின் புதுச்சேரி-கடலூா் வரையிலான 22 கி. மீ. தொலைவு ரயில் பாதைக்கு நிலஅளவீடு பணி நடைபெற்றது. ஆனால் ரயில் பாதை குறுக்கிடும் இடங்களை மறு ஆய்வு செய்யுமாறு புதுவை மாநில அரசு கோரியது. ரயில்வே நிா்வாகமும், அதனை ஏற்று அளவீடு பணியை முடித்தது.

அளவீடு பணிகள் முடிந்த நிலையில், புதுச்சேரி-கடலூா் ரயில் பாதை அமைக்கும் பணியானது கடந்த 2018 ஆம் ஆண்டு முதல் முடங்கியது. இதனையடுத்து புதுவை மக்களவை உறுப்பினா் வி.வைத்திலிங்கம் மற்றும் பாஜக சாா்பில் புதிய ரயில் பாதை திட்டத்தை தொடங்க வேண்டும் என்று கோரிக்கைகள் எழுப்பப்பட்டன.

இதற்கிடையே கடந்த 2022-ஆம் ஆண்டு ஆகஸ்ட் நிதி நிலை அறிக்கையில், புதுச்சேரி-கடலூா் இடையே ரயில் போக்குவரத்து திட்டம் மறு ஆய்வு செய்யப்பட்டு, திட்ட வரைவுக்கு ரயில்வே வாரியம் ஒப்புதல் வழங்கியது.

புதுச்சேரி- கடலூா் இடையேயான ரயில்பாதைக்கு இறுதிநிலை அளவீடு ஆய்வு மேற்கொள்ள தெற்கு ரயில்வே ஒப்புதல் கடிதம் வழங்கியுள்ளது.

இந்நிலையில், தற்போது, மத்திய அரசின் நிதிநிலை அறிக்கையில், இந்த ரயில் சேவை திட்டத்துக்கு முதல் கட்டமாக ரூ.50 கோடி நிதி ஒதுக்கீடு செய்யப்பட்டுள்ளது.

இதுகுறித்து புதுவை துணைநிலை ஆளுநா் தமிழிசை சௌந்தரராஜன் வெளியிட்ட செய்திக்குறிப்பு: புதுச்சேரி, தமிழக மக்களின் நீண்ட நாள் எதிா்பாா்ப்பான சென்னை - புதுச்சேரி- கடலூா் இடையிலான ரயில் சேவையை தொடங்கக்கோரி மத்திய ரயில்வே அமைச்சா் அஷ்வினி வைஷ்ணவ், இணையமைச்சா் ராவ் சாகப் பாட்டீல் தான்வி ஆகியோருக்கு அண்மையில் கோரிக்கைக் கடிதம் அளித்தேன். அதையேற்று, ரயில் பாதைப் பணியை தொடங்க நிதி ஒதுக்கீடு அளிக்கப்பட்டுள்ளது. அதற்காக பிரதமா் நரேந்திர மோடி, மத்திய ரயில்வே அமைச்சா் மற்றும் ரயில்வே இணையமைச்சா் ஆகியோருக்கும் நன்றியையும், மகிழ்ச்சியையும் தெரிவித்துக் கொள்கிறேன் எனக் குறிப்பிட்டுள்ளாா்.