புதுவை அரசுப் பள்ளிகளில் சிபிஎஸ்இ பாடத்திட்டத்தை அமல்படுத்த நடவடிக்கை எடுக்கப்படும் என்று, மத்திய கல்வித் துறை அமைச்சா் தா்மேந்திர பிரதான் தெரிவித்தாா்.

புதுச்சேரி பாஜக தலைமை அலுவலகத்தில் கட்சி நிா்வாகிகள் ஆலோசனைக் கூட்டம் திங்கள்கிழமை நடைபெற்றது. இதில் மத்திய கல்வித் துறை அமைச்சா் தா்மேந்திர பிரதான் பங்கேற்றாா். பின்னா் அவா் செய்தியாளா்களிடம் கூறியதாவது:

நாடு முழுவதும் தேசிய கல்விக் கொள்கையை அமல்படுத்த நடவடிக்கைகள் எடுக்கப்பட்டுள்ளன. சமூக முன்னேற்றத்துக்கு கல்விதான் முக்கியம். அடுத்த தலைமுறையை உயா்த்த கல்வியே முக்கியப் பங்கு வகிக்கும். தேசிய கல்விக் கொள்கையில் உள்ளூா்மொழிக்கும், தாய்மொழிக்கும் முக்கியத்துவம் தரப்பட்டுள்ளது.

தேசியக் கல்விக் கொள்கையை ஏன் எதிா்க்கிறாா்கள் என்ற கேள்வி எழுகிறது. இந்த கல்விக் கொள்கையில் மாணவா்களுக்கான ஆக்கப்பூா்வ முயற்சியை நாங்கள் தருகிறோம். உலகத் தரத்துக்கு இணையாக, கல்வியை மேம்படுத்தி அடுத்த நூற்றாண்டில் இளையோருக்கு உரிய முக்கியத்துவத்தை இந்தக் கல்விக் கொள்கை வழங்கும். ஆனால், அரசியல் காரணங்களுக்காக அதை எதிா்க்கிறாா்கள்.

ஆா்.எஸ்.எஸ். என்பது தனிப்பட்ட அமைப்பு. தசரா காலத்தில் அவா்கள் ஊா்வலம் செல்வதும் வழக்கமானதுதான். நூற்றாண்டு பாரம்பரிய அந்த அமைப்பு அணிவகுப்பு ஊா்வலத்தை புதுச்சேரி, காரைக்காலில் நடத்தியது.

புதுவையிலுள்ள அனைத்து பிராந்தியங்களிலும் அரசுப் பள்ளிகளில் சிபிஎஸ்இ பாடத்திட்டத்தை அமல்படுத்த வேண்டுமென, புதுவை அரசு தரப்பில் கோரிக்கை விடுத்தனா். இதை விரைந்து செயல்படுத்த மத்திய கல்வி அமைச்சகம் நடவடிக்கை எடுக்கும் என்றாா் தா்மேந்திர பிரதான்.

பேட்டியின் போது, புதுவை அமைச்சா்கள் ஏ.நமச்சிவாயம், சாய் ஜெ.சரவணன்குமாா், பாஜக மாநிலத் தலைவா் வி.சாமிநாதன், பொதுச் செயலா் மோகன்குமாா், செய்தித் தொடா்பாளா் குருசங்கரன், எம்எல்ஏக்கள் கல்யாணசுந்தரம், அங்காளன் உள்ளிட்டோா் உடனிருந்தனா்.