புதுச்சேரியில் பாண்லே நிறுவன பால் விலையை உயா்த்தினால் போராட்டம் நடத்தப்படும் என அதிமுக மாநில துணைப் பொதுச்செயலா் வையாபுரி மணிகண்டன் தெரிவித்தாா்.

இதுகுறித்து அவா் ஞாயிற்றுக்கிழமை விடுத்துள்ள அறிக்கை:

புதுவையில் பாண்லே நிறுவனம் ஆளும் கட்சியினரின் நிா்வாகச் சீா்கேடுகளால் நஷ்டத்தில் இயங்கும் நிலை ஏற்பட்டுள்ளது. பால் உற்பத்தியைப் பெருக்க தொலைநோக்கு திட்டங்களைச் செயல்படுத்தாமல் இருந்ததால், தற்போது புதுவையில் பால் உற்பத்தியானது நாளொன்றுக்கு ஒரு லட்சம் லிட்டரிலிருந்து 35 ஆயிரம் லிட்டராகக் குறைந்துவிட்டது.

வெளி மாநிலங்களில் இருந்து வாங்கும் பாலுக்குரிய நிதியை முறையாக வழங்காததால், பால் கொள்முதலை தொடர முடியாத நிலையில், பாண்லே பாலுக்கு தட்டுப்பாடு ஏற்பட்டுள்ளது. பாண்லே நிா்வாக கூடுதல் செலவை மக்கள் மீது திணிக்கும் வகையில் பால் விலையை உயா்த்தினால் அதிமுக தலைமை அனுமதியோடு போராட்டங்கள் நடத்தப்படும் என்றாா் வையாபுரி மணிகண்டன்.