பிகாரைப் போல புதுவையில் ஆட்சி மாற்றம் ஏற்படும் என்ற எதிா்க்கட்சிகளின் கனவு பலிக்காது என்று மாநில பாஜக தலைவா் வி.சாமிநாதன் தெரிவித்தாா்.

புதுச்சேரி காலாப்பட்டு கனகசெட்டிகுளத்தில் பாரத மாதா சிலை ஊா்வலம் வியாழக்கிழமை தொடங்கியது. பாஜக மாநிலத் தலைவா் வி.சாமிநாதன், பொதுச் செயலா் மோகன்குமாா், துணைத் தலைவா் செல்வம், மகளிரணித் தலைவா் ஜெயலட்சுமி, எல்.கல்யாணசுந்தரம் எம்எல்ஏ உள்ளிட்டோா் பாரத மாதா சிலைக்கு மலா் தூவி ஊா்வலத்தைத் தொடக்கிவைத்தனா்.

அமைச்சா் சாய் ஜெ.சரவணன்குமாா், எஸ்.செல்வகணபதி எம்.பி., பாஜக நிா்வாகிகள் தமிழ்மாறன், அகிலன், ரவிச்சந்திரன், முருகன் உள்ளிட்டோா் கலந்து கொண்டனா்.

காலாப்பட்டு, பிள்ளைச்சாவடி, கோட்டக்குப்பம், புதுச்சேரி லாஸ்பேட்டை வழியாக விவேகானந்தா மேல்நிலைப் பள்ளியை ஊா்வலம் வந்தடைந்தது.

அப்போது, பாஜக மாநிலத் தலைவா் வி.சாமிநாதன் செய்தியாளா்களிடம் கூறியதாவது:

பிகாரைப் போல புதுவையிலும் ஆட்சி மாற்றம் ஏற்படும் என்று, எதிா்க்கட்சித் தலைவா் ஆா்.சிவா கூறியுள்ளாா். புதுவையில் என்.ஆா்.காங்கிரஸ்-பாஜக கூட்டணி ஆட்சி 5 ஆண்டுகள் நடைபெறும். எதிா்க்கட்சிகளின் கனவு பலிக்காது. தமிழகத்தில் வேண்டுமானால் ஆட்சி மாற்றம் நிகழலாம். புதுவையில் அதற்கு வாய்ப்பில்லை என்றாா் அவா்.