புதுச்சேரி: புதுச்சேரி அருகே தவளக்குப்பத்தில் இயங்கி வரும் தனியாா் வங்கியின் லாக்கரை உடைத்துத் திருட முயன்ற மா்ம நபா்களை போலீஸாா் தேடி வருகின்றனா்.

புதுச்சேரி அருகே தவளக்குப்பத்தில் அபிஷேகப்பாக்கம் செல்லும் சாலை ராஜாராம் நகரில் வாடகை கட்டடத்தில் தனியாா் வங்கி இயங்கி வருகிறது. சனிக்கிழமை வேலை நேரம் முடிந்ததும் ஊழியா்கள் வங்கியைப் பூட்டிவிட்டுச் சென்றனா். ஞாயிற்றுக்கிழமை விடுமுறை என்பதால், வங்கி திறக்கப்படவில்லை. திங்கள்கிழமை காலை ஊழியா்கள் வங்கியைத் திறந்து உள்ளே சென்று பாா்த்த போது, மா்ம நபா்கள் வங்கியில் திருட முயன்றது தெரிய வந்தது.

இதுதொடா்பாக வங்கி மேலாளருக்கும், தவளக்குப்பம் போலீஸாருக்கும் ஊழியா்கள் தகவல் தெரிவித்தனா்.

அதன் பேரில், அங்கு வந்த வங்கி மேலாளா், புதுச்சேரி தெற்கு பகுதி எஸ்.பி. லோகேஷ்வரன் தலைமையிலான தவளக்குப்பம் போலீஸாா், திருட்டு முயற்சி நடந்த இடத்தைப் பாா்வையிட்டு ஆய்வு செய்தனா். தடயவியல் நிபுணா்கள் வரவழைக்கப்பட்டு, தடயங்கள் சேகரிக்கப்பட்டன.

வங்கியின் பக்கவாட்டில் உள்ள ஜன்னல் கம்பிகளை அறுத்து எடுத்து, வங்கிக்குள் நுழைந்த மா்ம நபா்கள், காசாளா் அறைக்குப் பின்புறம் பணம், நகைகள் உள்ள கான்கிரீட் லாக்கரை டிரில்லிங் இயந்திரத்தால் உடைக்க முயன்றுள்ளனா். லாக்கரை உடைக்க முடியாததால், மா்ம நபா்கள் அப்படியே விட்டுவிட்டு தப்பியோடியது தெரிய வந்தது. மேலும், தப்பியோடும் போது, யாரிடமும் பிடிபடாமல் இருக்க கண்காணிப்புக் காட்சிகள் பதிவாகும் ஹாா்ட் டிஸ்க்கையும் அவா்கள் திருடிச் சென்றுள்ளனா்.

இதுகுறித்து வங்கி மேலாளா் விஜய் ராம் பிரசாத் அளித்த புகாரின் பேரில், தவளக்குப்பம் போலீஸாா் வழக்குப் பதிந்து, வங்கியில் திருட முயன்ற மா்ம நபா்களைத் தேடி வருகின்றனா்.