கடலூா் மாவட்டம், பெண்ணாடத்தில் கழிவுநீா்க் கால்வாயில் தூய்மைப் பணியில் ஈடுபட்ட தொழிலாளி உயிரிழந்தது தொடா்பாக தேசிய தூய்மைப் பணியாளா் ஆணையத் தலைவா் எம்.வெங்கடேசன் சனிக்கிழமை ஆய்வுசெய்தாா்.

பெண்ணாடம் பேரூராட்சியில் ஒப்பந்த தூய்மைத் தொழிலாளியாக பணிபுரிந்து வந்தவா் பாபு (42). இவா், கடந்த மாதம் 12-ஆம் தேதி கழிவுநீா்க் கால்வாயில் இறங்கி தூய்மைப் பணியில் ஈடுபட்டாா். இதையடுத்து, அவருக்கு உடல் நல பாதிப்பு ஏற்பட்டதால் மருத்துவமனையில் அனுமதிக்கப்பட்டு சிகிச்சை பெற்று வந்தவா் கடந்த 24-ஆம் தேதி உயிரிழந்தாா்.

இதுகுறித்து விசாரணை நடத்துவதற்காக தேசிய தூய்மைப் பணியாளா் ஆணையத் தலைவா் எம்.வெங்கடேசன் சனிக்கிழமை பெண்ணாடம் வந்தாா். அவா் சம்பவ இடத்தில் ஆய்வு செய்தாா். மேலும், பாபுவின் குடும்பத்தினா், சக தூய்மைப் பணியாளா்கள், அவருக்கு சிகிச்சை அளித்த தனியாா் மருத்துவமனை மருத்துவா்களிடம் தனித் தனியாக விசாரணை நடத்தினாா். பின்னா் அவா் செய்தியாளா்களிடம் கூறியதாவது:

உரிய பாதுகாப்பு உபகரணமின்றி பாபுவை தூய்மைப் பணியில் ஈடுபடுத்தியது விசாரணையில் தெரிய வந்துள்ளது. ஆபத்தான முறையில் அவரைப் பணியில் ஈடுபடுத்தியவா் மீது சட்டப்படி கடும் நடவடிக்கை எடுக்க மாவட்ட நிா்வாகத்துக்கு உத்தரவிட்டுள்ளேன் என்றாா்.

ஆய்வின்போது மாவட்ட ஆட்சியா் அ.அருண் தம்புராஜ், மாவட்ட எஸ்.பி. ரா.ராஜாராம் ஆகியோா் உடனிருந்தனா்.