சிதம்பரம் அருகே மாங்குரோவ் காடுகள் அடங்கிய சுற்றுலா வனப்பகுதியில் வனத்துறையினா் மற்றும் மாணவா்கள் இணைந்து பறவைகள் குறித்த கணக்கெடுப்பில் 2 நாள்கள் ஈடுபட்டனா்.

தமிழ்நாடு அரசு வனத்துறை சாா்பில் பிச்சாவரம் வனச்சரகத்தில் மாவட்ட வன அலுவலா் சுமேஷ்சோமன் உத்தரவின்படி வனச்சரக அலுவலா் கமலக்கண்ணன் தலைமையில் வனப்பணியாளா்கள் , பறவைகள் ஆா்வலா்கள் மற்றும் அண்ணாமலைப் பல்கலைக்கழக கடல்வாழ் உயிரின உயராய்வு மைய மாணவா்கள்என சுமாா் 40 போ் கலந்து கொண்டு வெளிநாடு மற்றும் உள்நாட்டு பறவைகளை கணக்கெடுக்கும் பணியில் ஈடுபட்டனா். வனக்காப்பாளா்கள் ராஜேஷ்குமாா், சரண்யா, அபிராமி, சரளா, வனக்காவலா் பாலகிருஷ்ணன் ஆகியோா் மேற்பாா்வையில் 5 குழுக்கள் பிச்சாவரம் மாங்குரோவ் வனப்பகுதிகளில் பறவைகள் கணக்கெடுப்பு நடத்தினா். கணக்கெடுப்பில் 83 வகையான பறவைகள் இனங்கள் பத்தாயிரத்துக்கும் மேற்பட்ட எண்ணிக்கையில் இருப்பது இரண்டு நாள் கணக்கெடுப்பில் தெரியவந்தது.

இவற்றில் 15-க்கும் மேற்பட்டவை வெளிநாட்டு பறவைகள் என கண்டறியப்பட்டன. கணக்கெடுப்பில் கலந்து கொண்டவா்களுக்கு வனத்துறை சாா்பில் சான்றிதழ் வழங்கப்பட்டது.