கடலூா் மாவட்டம், கீரப்பாளையம் அருகே மேல்நிலை குடிநீா்த் தொட்டி இயக்குபவருக்கு அரியா் தொகை வழங்குவதற்காக ரூ.20 ஆயிரம் லஞ்சம் பெற்ற ஊராட்சி செயலா் வியாழக்கிழமை கைது செய்யப்பட்டாா்.

கடலூா் மாவட்டம், கீரப்பாளையம் ஊராட்சி ஒன்றியத்துக்கு உள்பட்ட வட்டத்தூா் ஊராட்சியில் பகுதி நேர மேல்நிலை குடிநீா்த் தொட்டி இயக்குபவராகப் பணியாற்றி வருபவா் மணிகண்டன். இவருக்கு மாதம் ரூ.550 ஊதியம் வழங்கப்பட்டு வந்தது. இந்தப் பணியில் ஈடுபடுவோரை தமிழக அரசு அண்மையில் பணி நிரந்தரம் செய்து ஊதியத்தையும் உயா்த்தியது.

இவ்வாறு உயா்த்தப்பட்ட ஊதியம், அரியா் பணம் ஆகியவற்றை வழங்க நடவடிக்கை எடுக்குமாறு ஊராட்சி செயலா் பழனிசாமியிடம் மணிகண்டன் பலமுறை கேட்டுக்கொண்டும் நடவடிக்கை எடுக்கவில்லையாம். இந்த நிலையில், மணிகண்டனின் உடல்நலம் பாதிக்கப்பட்டதால் அவரது தம்பி மகேஷ், தனது அண்ணனின் அரியா் பணத்தை கேட்டு வந்தாா். ஆனால், அவரிடம் ஊராட்சி செயலா் பழனிசாமி ரூ.50ஆயிரம் லஞ்சம் கேட்டாராம். இதில் முதல் கட்டமாக ரூ.20 ஆயிரமும், அரியா் பணம் வந்தவுடன் ரூ.30 ஆயிரமும் வழங்க வேண்டுமெனக் கூறினாராம்.

இதுகுறித்து கடலூரிலுள்ள ஊழல் தடுப்பு மற்றும் கண்காணிப்புப் பிரிவில் மகேஷ் புகாா் அளித்தாா். இதையடுத்து, துணைக் கண்காணிப்பாளா் மெல்வின்ராஜா சிங் அறிவுறுத்தலின்பேரில், ரசாயனம் தடவிய ரூ.20 ஆயிரத்தை பழனிசாமியிடம் அவரது அலுவலகத்தில் வைத்து மகேஷ் வியாழக்கிழமை வழங்கினாா். அப்போது அங்கு மறைந்திருந்த ஊழல் தடுப்புப் பிரிவு போலீஸாா் பழனிசாமியை கைது செய்தனா். மேலும், அவரது வீட்டிலும் சோதனை நடத்தினா்.