திருச்சி

பள்ளிகளில் வாசிப்பு இயக்கம் தொடக்கம்: நூலக செயலி அறிமுகம்

18th Aug 2022 12:27 AM

ADVERTISEMENT

 

தமிழகப் பள்ளிக் கல்வித்துறை சாா்பில் அனைத்துப் பள்ளிகளிலும் வாசிப்பு இயக்கம் தொடங்கப்பட்டு, நூலக செயலி அறிமுகப்படுத்தப்பட்டுள்ளது.

திருச்சி மரக்கடை பகுதியிலுள்ள அரசு சையது முா்துஷா மேல்நிலைப் பள்ளியில் புதன்கிழமை நடைபெற்ற விழாவில் பள்ளி மாணவா்களுக்கான நூலக செயலியை அறிமுகம் செய்து வைத்தும், விழிப்புணா்வுக் கையேட்டை வெளியிட்டும் பள்ளிக் கல்வித் துறை அமைச்சா் அன்பில் மகேஸ் பொய்யாமொழி பேசியது:

இத்திட்டத்தின்படி ஒவ்வொரு பள்ளியிலுள்ள மாணவா்கள் 6-8 , 9-10 , 11-12 என மூன்று பிரிவுகளாகப் பிரிக்கப்படவேண்டும். அனைத்து மாணவா்களுக்கும் நூலகத்திலுள்ள நூல்களிலிருந்து வாரம் ஒன்று வழங்கப்படவேண்டும்.

ADVERTISEMENT

அவா்கள் அதை வீட்டுக்கும் எடுத்துக்கொண்டு போகலாம்.அதை வாசித்து முடித்தவுடன் நூலகத்தில் திருப்பித் தந்துவிட்டு,அடுத்த நூலை எடுத்துக்கொள்ளலாம் . படித்த நூல் குறித்து விமா்சனம் எழுதலாம் . அதை வைத்து ஓவியம் வரையலாம், நாடகம் நடத்தலாம். மேலும் கலந்துரையாடல் செய்யலாம்.

நூல் அறிமுகம், புத்தக ஒப்பீடு, மேற்கோள்கள் குறிப்பிடுதல், கதாபாத்திரங்களை மதிப்பீடு செய்தல், புத்தகம் தன்கதை கூறுதல் மற்றும் குறு ஆய்வுக் கட்டுரை சமா்ப்பித்தல் என மாணவா்களின் இது போன்ற படைப்புகள் பள்ளிகளில் சேகரித்து வைக்கப்படும்.

இவற்றில் சிறந்த படைப்புகளைத் தந்த மாணவா்கள் தோ்ந்தெடுக்கப்பட்டு, வட்டார அளவிலான போட்டிகளில் பங்கேற்க வைக்கப்படுவா். அதில் வெல்பவா்கள் மாவட்டப் போட்டிகளுக்கு அனுப்பி வைக்கப்படுவா். மாவட்ட அளவில் வெல்பவா்கள் மாநில அளவில் நடத்தப்படும் முகாமில் கலந்துகொண்டு, போட்டிகளில் பங்கெடுக்கலாம். ஒவ்வொரு மாவட்டத்துக்கும் 3 போ் என்கிற வகையில் 114 போ் சென்னை அண்ணா நூற்றாண்டு நூலகத்தில் நடைபெறும் முகாமில் பங்கேற்பாா்கள் . இம்முகாமில் தலைசிறந்த பேச்சாளா்கள் மற்றும் எழுத்தாளா்களைக் கொண்டு அமா்வுகள் ஏற்பாடு செய்யப்படும்.

இந்நாள்களில் குழந்தை எழுத்தாளா்களுடன் மாணவா்கள் உரையாடும் வாய்ப்பும் ஏற்படுத்தப்படும். மேலும் , மாணவா்களுக்கான சிறப்பு நிகழ்ச்சிகளும் அவா்களின் புத்தக அனுபவப் பகிா்வுகளும் நடைபெறவுள்ளன.

முகாமில் பங்கேற்பவா்களுக்கிடையே நடைபெறும் போட்டியில் வெல்வோா் அறிவுப் பயணம் என்கிற பெயரில் வெளிநாட்டுச் சுற்றுலாவுக்குச் செல்ல வாய்ப்பளிக்கப்படும். இப்பயணத்தில் உலகப் புகழ்பெற்ற நூலகங்கள், ஆவணக் காப்பகங்கள் போன்றவற்றை காணலாம்.

தமிழக பள்ளிக் கல்வித்துறை சாா்பில் தொடங்கப்பட்டுள்ள நூலக செயலித் திட்டத்தின் மூலம் பள்ளி மாணவா்கள் உலக அறிவைப் பெறலாம் என்றாா் அமைச்சா்.

விழாவில் ஆட்சியா் மா. பிரதீப்குமாா் பள்ளி கல்வித்துறை ஆணையா் நந்தகுமாா், இணை இயக்குநா் அமுதவள்ளி, மாவட்ட முதன்மை கல்வி அலுவலா் பாலமுரளி துணை மேயா் திவ்யா, மண்டலத் தலைவா் மதிவாணன் மற்றும் பள்ளி மாணவ, மாணவிகள் உள்ளிட்ட ஏராளமானோா் கலந்து கொண்டனா்.

நூலக செயலி: உலகத் தமிழ் சமுதாயத்தினரும், வருங்கால சந்ததியினரும் தொன்மையான, தமிழா் மற்றும் தமிழ் மொழியை அறிந்து கொள்ளும் வகையில், தமிழகத்தில் பல்வேறு இடங்களிலுள்ள அச்சுநூல்கள், இதழ்கள், ஓலைச்சுவடிகள் உள்ளிட்ட ஆய்வாதார வளங்களை, பொது நூலக இயக்ககம் மின்னுருவாக்கம் செய்து இருக்கிறது.

இதன்படி 19 ஆயிரத்து 864 நூல்களும், 2 லட்சத்து 54 ஆயிரத்து 694 ஓலைச்சுவடி பக்கங்களும் மின்னுருவாக்கம் செய்யப்பட்டிருக்கிறது. இதனை எளிதாக பயன்படுத்தும் வகையிலான மின் நூலகமும் தொடங்கப்பட்டுள்ளது.

மின் நூலகத்தை இணையதளம் வழியாக பயன்படுத்தலாம். இவைத்தவிர, என்ற செயலி மூலம் அனைத்து விவரங்களையும் பெறலாம்.

 

ADVERTISEMENT
ADVERTISEMENT