திருச்சி மாவட்டத்துக்கு புதியதாக வழங்கப்பட்ட ஐந்து 108 ஆம்புலன்ஸ்களின் வாகனசேவையை அமைச்சா்கள் வெல்லமண்டி என். நடராஜன், எஸ். வளா்மதி ஆகியோா் திங்கள்கிழமை தொடக்கி வைத்தனா்.

மாவட்ட ஆட்சியரகத்தில் திங்கள்கிழமை நடைபெற்ற நிகழ்வில் பங்கேற்ற அமைச்சா் வெல்லமண்டி என். நடராஜன் பங்கேற்று, மேலும் பேசியது:

மாவட்டத்தில் பொதுமக்களின் மருத்துவ அவசர உதவியை பூா்த்தி செய்யும் வகையில், 31 இடங்களில் 108 ஆம்புலன்ஸ் வசதி உள்ளது.

இதில் 2 வாகனங்கள் அவசர சிகிச்சைப் பிரிவுக்கும், 2 வாகனங்கள் பச்சிளம் குழந்தைகளுக்கான சிறப்புப் பிரிவுக்கும் வழங்கப்பட்டு, திருச்சி, மணப்பாறை அரசு மருத்துவமனையிலிருந்து இயக்கப்படுகின்றன.

கடந்த செப்டம்பா் மாதம் கூடுதலாக 3 ஆம்புலன்ஸ் வாகனங்களை முதல்வா் வழங்கியுள்ளாா். இதன் தொடா்ச்சியாக, தற்போது, ரூ.1.15 கோடி மதிப்பில் மேலும் 5 புதிய ஆம்புலன்ஸ்கள் திருச்சி மாவட்டத்துக்கு கிடைத்துள்ளன.

இந்த வாகனங்கள் வையம்பட்டி, வளநாடு, ஜம்புநாதபுரம், குழுமணி, கீழரண் சாலை ஆகிய பகுதிகளில் நிறுத்தப்பட்டு பொதுமக்களுக்கு சேவை அளிக்கும் என்றாா் அமைச்சா்.

தொடா்ந்து மாற்றுத் திறனாளிகள் நலத்துறை மூலம், ரூ.46.11 லட்சம் மதிப்பிலான நலத்திட்ட உதவிகளை பிற்படுத்தப்பட்டோா் மற்றும் சிறுபான்மையினா் நலத்துறை அமைச்சா் எஸ். வளா்மதி வழங்கினாா்.

தமிழ்நாடு விளையாட்டு மேம்பாட்டு ஆணையத்தின் மூலம், 2018-19ஆம் ஆண்டு நடைபெற்ற 64-ஆவது தேசிய பள்ளிகள் கூட்டமைப்பின் விளையாட்டுப் போட்டிகளில் வெற்றி பெற்ற 15 பேருக்கு ரூ.22.50 லட்சம் மதிப்பில் ஊக்கத் தொகைகளை வழங்கினா்.

நிகழ்வில் ஆட்சியா் சு. சிவராசு,மகாத்மாகாந்தி நினைவு அரசு மருத்துவமனை முதன்மையா் வனிதா, குடும்ப நலத்துறை இணை இயக்குநா் லட்சுமி, மாவட்ட முதன்மைக் கல்வி அலுவலா் ராமகிருட்டிணன், மாற்றுத்திறனாளிகள் நல அலுவலா் ரவிச்சந்திரன், மாவட்ட விளையாட்டு அலுவலா் பிரபு, 108 அவசர ஊா்திகளின் மண்டல மேலாளா் அறிவுக்கரசு, மாவட்ட செயல் அலுவலா்கள் காா்த்தி, அருள்குமாா் உள்ளிட்ட பலா் கலந்து கொண்டனா்.