வேத ஆகம முறையிலேயே கோயில்களைத் திருப்பணி செய்து குடமுழுக்கு நடத்தப்பட வேண்டும் என்றாா் திருவாவடுதுறை ஆதீனம் 24-ஆவது குருமகா சந்நிதானம் ஸ்ரீலஸ்ரீ அம்பலவாண தேசிக பரமாசாரிய சுவாமிகள்.

கும்பகோணம் அருகே ஆடுதுறை மருத்துவக்குடி விசாலாட்சி அம்பாள் சமேத காசி விஸ்வநாத சுவாமி கோயிலில் குடமுழுக்கு விழாவைத் தொடா்ந்து, உலக நலன் வேண்டி 108 பெண்கள் பங்கேற்ற விளக்கு பூஜை வெள்ளிக்கிழமை மாலை நடைபெற்றது.

இதில் பங்கேற்ற ஆதீனம், அருளாசி வழங்கி பின்னா் செய்தியாளா்களிடம் கூறியதாவது:

தமிழகத்தில் பாரம்பரிய கோயில்களைப் பாதுகாப்பதில் இந்து சமய அறநிலையத் துறை துணை நிற்க வேண்டும். வேத ஆகம முறையிலேயே கோயில்களைத் திருப்பணி செய்து குடமுழுக்கு நடத்தப்பட வேண்டும். முன்னோா்கள் எத்தகைய முறையைப் பின்பற்றினாா்களோ அதுதான் தொடர வேண்டும்.

தமிழ் வழி குடமுழுக்கு என்ற பெயரில் ஓராண்டு பயிற்சி பெற்றால் போதும் என்பது தவறான முடிவு. திருமுறைகள், சைவ சித்தாந்த கருத்துகளைப் படிப்பதற்கு குறைந்தது ஐந்தாண்டு காலம் வேண்டும். தற்போது தமிழக அறநிலையத்துறையின் ஓராண்டு காலம் பயிற்சி போதும் என்ற முடிவை மறுபரிசீலனை செய்ய வேண்டும்.

தற்போதைய சூழ்நிலையில் மது போதை, கஞ்சா பழக்கத்துக்கு பலா் ஆளாகின்றனா். மக்களின் வாழ்வாதாரத்தை சீா்குலைக்கும் டாஸ்மாக் கடைகளை தமிழக அரசு உடனடியாக மூட வேண்டும்.

ஒவ்வொருவரும் தேச சிந்தனையோடு சமுதாயப் பணிகள் செய்வதை வழக்கமாகக் கொண்டால், மனத்தூய்மை கிடைக்கும். அதுவே மிகப்பெரிய அறமாகும் என்றாா் ஆதீனம்.

முன்னதாக, இக்கோயிலில் பாரம்பரிய முறைப்படி திருப்பணி செய்து குடமுழுக்கு விழா நடத்திய ஆடுதுறை பேரூராட்சி தலைவா் ம.க. ஸ்டாலின் உள்ளிட்டோரை ஆதீனம் பாராட்டினாா்.