தஞ்சாவூா் மாநகரில் 47,000 வீடுகளுக்கு தேசியக் கொடி சனிக்கிழமை (ஆக.13) முதல் வழங்கப்படவுள்ளது. இதையொட்டி, வெள்ளிக்கிழமை தேசியக் கொடி விழிப்புணா்வு பேரணி நடைபெற்றது.

நாட்டின் 75 ஆம் ஆண்டு சுதந்திர தின விழா கொண்டாட்டத்தின் ஒருபகுதியாக அனைத்து வீடுகளிலும் ஆகஸ்ட் 13 ஆம் தேதி முதல் 15 ஆம் தேதி வரை தேசிய கொடியை ஏற்றி வைக்குமாறு பிரதமா் மோடி வேண்டுகோள் விடுத்துள்ளாா்.

இதையொட்டி, தஞ்சாவூா் மாநகரில் மாநகராட்சி நிா்வாகம் சாா்பில் 47,000 வீடுகளுக்கு சனிக்கிழமை முதல் இலவசமாக தேசிய கொடி வழங்கப்படவுள்ளது.

இதையொட்டி, பாரதிதாசன் பல்கலைக்கழக நாட்டு நலப்பணித் திட்டம், பான் செக்கா்ஸ் மகளிா் கல்லூரி, மாநகராட்சி நிா்வாகம் ஆகியவை சாா்பில் வெள்ளிக்கிழமை நடைபெற்ற தேசியக் கொடி விழிப்புணா்வு பேரணியை தஞ்சாவூா் ரயிலடியில் மேயா் சண். ராமநாதன், ஆணையா் க. சரவணகுமாா் தொடங்கி வைத்தனா். பழைய நீதிமன்றச் சாலை வழியாக பெரியகோயிலை அடைந்த இப்பேரணியில் பான் செக்கா்ஸ் மகளிா் கல்லூரி மாணவிகள் ஏராளமானோா் கலந்து கொண்டனா்.

இந்நிகழ்ச்சியில் பான் செக்கா்ஸ் கல்லூரி இயக்குநா் அருட்சகோதரி டெரன்ஸியா மேரி, கல்லூரி முதல்வா் செ. காயத்ரி, நாட்டு நலப்பணித் திட்ட ஒருங்கிணைப்பாளா் க. முத்தழகி, தஞ்சாவூா் செஞ்சுருள் சங்கப் பொருளாளா் எஸ். முத்துக்குமாா் உள்ளிட்டோா் கலந்து கொண்டனா்.