புதுக்கோட்டை மாவட்டம், திருவரங்குளம் வட்டம், கண்டாக்குடிப்பட்டி வரதராஜப்பெருமாள் கோயிலுக்குச் செல்லும் சாலை குண்டும்குழியுமாக இருப்பதால், தாா்ச்சாலை அமைத்துத் தர வேண்டும் என பொதுமக்கள் கோரிக்கை வைக்கின்றனா்.

திருவரங்குளம் வட்டம் பாலையூா் ஊராட்சிக்குள்பட்ட கண்டாக்குடிப்பட்டியில் சுமாா் 200 ஆண்டுகள் பழைமையான வரதராஜப்பெருமாள் கோயில் உள்ளது. அரிமளத்திலிருந்து அறந்தாங்கி செல்லும் சாலையில் இருந்து இடதுபுறமாகத் திரும்பும் குண்டும் குழியுமான சாலைதான் இதற்கான போக்குவரத்து வழி. அருகேயுள்ள மாலாகுடி வழியாகவும் மாற்றுப்பாதையில் செல்லலாம். அதுவும் குண்டும் குழியுமாகவே உள்ளது. இந்த இரு சாலைகளும் தலா ஒரு கி.மீ. தொலைவு உள்ளவை. திருவிழா காலங்களில் இந்தக் கோயிலுக்கு அருகே உள்ள சிவகங்கை மாவட்டத்தில் இருந்தும் பக்தா்கள் வருவாா்கள்.

இதுகுறித்து அந்த ஊரைச் சோ்ந்த ஆா். ராமசாமி கூறியது:

பிரசித்திபெற்ற இந்தக் கோயிலுக்கு வரும் பக்தா்களுக்காக இச்சாலைகளை சீரமைத்து தாா்ச்சாலையாக மாற்றித் தர வேண்டும். அவ்வாறு செய்து தரும்போது, கோயில் பக்தா்கள் மட்டுமின்றி, கண்டாக்குடிப்பட்டி மற்றும் மாலாகுடி கிராமங்களில் வசிக்கும் பொதுமக்களுக்கும் மிகுந்த பயனுள்ளதாக இருக்கும் என்கிறாா் அவா்.