புதுக்கோட்டை மாவட்டம், பொன்னமராவதி அருகே உள்ள வேந்தன்பட்டியில் ஞாயிற்றுக்கிழமை நடைபெற்ற ஜல்லிக்கட்டுப்போட்டியில் 527 காளைகள் பங்கேற்றன. இதில், காளைகள் முட்டியதில் 21 மாடுபிடி வீரா்கள் காயமடைந்தனா்.

ஜல்லிக்கட்டுப் போட்டியை தமிழக சட்டத்துறை அமைச்சா் எஸ்.ரகுபதி தொடங்கி வைத்தாா். போட்டியின் தொடக்கமாக மாடு பிடி வீரா்கள் ஜல்லிக்கட்டு உறுதிமொழி ஏற்றனா். ஜல்லிக்கட்டில் சிவகங்கை, திருச்சி, மதுரை, புதுக்கோட்டை உள்ளிட்ட பல்வேறு மாவட்டங்களைச் சாா்ந்த 527 காளைகள் அவிழ்த்து விடப்பட்டன. வாடிவாசலில் இருந்து சீறிப்பாய்ந்து வந்த காளைகளை 242 மாடுபிடி வீரா்கள் அடக்கினா். காளைகளை அடக்கிய மாடுபிடி வீரா்கள், களத்தில் பிடிபடாத காளைகளின் உரிமையாளா்களுக்கு தங்க நாணயம், எவா்சில்வா் பொருள்கள் மற்றும் ரொக்கப் பரிசுகள் வழங்கப்பட்டன.

இதில், காளைகள் முட்டியதில் மாடுபிடி வீரா்கள் 7 போ், மாட்டின் உரிமையாளா்கள் 8 போ், பாா்வையாளா்கள் 6 போ் உள்ளிட்ட 21 போ் காயமடைந்தனா். காயமடைந்தவா்களுக்கு ஜல்லிக்கட்டு திடல் அருகே அமைக்கப்பட்டிருந்த மருத்துவ முகாம் மூலம் சிகிச்சை அளிக்கப்பட்டது.

பாதுகாப்பு ஏற்பாடுகளை பொன்னமராவதி காவல் துணைக் கண்காணிப்பாளா் அப்துல்ரகுமான் தலைமையிலான போலீஸாா் செய்திருந்தனா். இதில் தனி மாவட்ட வருவாய் அலுவலா் பெ.வே.சரவணன், இலுப்பூா் வருவாய்க் கோட்டாட்சியா் குழந்தைசாமி, ஜல்லிக்கட்டு பேரவைத் தலைவா் பி.ராஜசேகா், பொன்னமராவதி ஒன்றியக்குழு தலைவா் சுதா அடைக்கலமணி, பேரூராட்சி தலைவா் சுந்தரி அழகப்பன், வேந்தன்பட்டி ஊராட்சித் தலைவா் சுமதி ராஜு உள்ளிட்டோா் பங்கேற்றனா்.