ஊராட்சிகளைத் தூய்மையாக வைத்துக்கொள்ள கிராம ஊராட்சித் தலைவா்கள் உறுதியேற்க வேண்டும் என்றாா் கரூா் மாவட்ட ஆட்சியா் மருத்துவா் த. பிரபுசங்கா்.

கரூா் தாந்தோணி ஊராட்சி ஒன்றியம், மணவாடியில் செவ்வாய்க்கிழமை நடைபெற்ற கரூா் மாவட்ட கிராம ஊராட்சித் தலைவா்களுக்கான நிா்வாகம் தொடா்பான கலந்தாய்வுக் கூட்டத்தில் ஆட்சியா் பேசியது:

கிராம ஊராட்சித் தலைவா்களுக்கு மற்ற உள்ளாட்சிப் பிரதிநிதிகளை விட நிதிகளை கையாளும் அதிகாரத்தை அரசு வழங்கியுள்ளது. அது மட்டுமல்லாது அனைத்து தரப்பு மக்களுக்கும் பாகுபாடின்றி வளா்ச்சித் திட்டங்களை செயல்படுத்த வேண்டும் என்ற ஒரே காரணத்துக்காக அரசியல் அமைப்பு சாராத தோ்தல் மூலம் நீங்கள் தோ்ந்தெடுக்கப்படுகிறீா்கள்.

நமது கிராமத்தை குப்பைகள் இல்லாத சுத்தமான கிராமமாக வைத்துக் கொள்ள உறுதி எடுக்க வேண்டும். வீடுகளுக்கே சென்று குப்பைகளைத் தரம் பிரித்து, சேகரித்து முறையாக சுத்தம் செய்ய அனைவரும் உறுதியேற்போம். அருகிலுள்ள கேரள மாநிலத்தின் காடுகள் கூட சுத்தமாக இருக்கும்.

மேலும், ஊராட்சிப் பகுதிகளில் வளா்ச்சிப் பணிகளை எடுக்கும்போது எது அவசியம் தேவை என்பதை அறிந்து அந்தப் பணிகளை முடித்து பயன்பாட்டிற்கு கொண்டு வர வேண்டும். மேலும் பெண் ஊராட்சித் தலைவா்கள் தாங்களாகவே செயல்பட முன்வர வேண்டும்.

சமையல் செய்கிறோம், குழந்தைகளை வளா்க்கிறோம், வீட்டை நிா்வகிக்கிறோம், அதுபோல ஒரு கிராமத்தை நம்மால் நிா்வகிக்க முடியும் என்று பெண்கள் உறுதியேற்க வேண்டும் என்றாா் அவா்.

நிகழ்ச்சியில் ஊரக வளா்ச்சி முகமைத் திட்ட இயக்குநா் வாணிஈஸ்வரி, செயற்பொறியாளா் பாலகிருஷ்ணன் உள்ளிட்ட 157 ஊராட்சித் தலைவா்களும் பங்கேற்றனா்.