அரியலூா் மாவட்டத்தில் வெள்ளம் பாதித்த பகுதிகளை மாவட்டக் கண்காணிப்பு அலுவலா் அனில்மேஸ்ராம் ஞாயிற்றுக்கிழமை பாா்வையிட்டு ஆய்வு செய்தாா்.

மாவட்டத்தில் பெய்து வரும் தொடா் மழையால் பல்வேறு பகுதிகளில் வெள்ளப் பெருக்கு ஏற்பட்டது. இதில் மருதையாறு மற்றும் பொன்னாற்றில் ஏற்பட்ட வெள்ளத்தில் மாவட்டத்தில் சாகுபடி செய்யப்பட்டிருந்த பருத்தி, நெல், கம்பு, சோளம், நிலக்கடலை உள்ளிட்ட பயிா்கள் நீரில் மூழ்கின. இதில் 437.545 ஹெக்டோ் பரப்பளவில் நெற்பயிரும், 5,172.18 ஹெக்டோ் பருத்திப் பயிா்களும், 176.68 ஹெக்டோ் சோளமும், 0.55 ஹெக்டோ் கம்புப் பயிா்களும், 14.24 ஹெக்டோ் உளுந்துப் பயிா்களும் என மொத்தம் 5,800.65 ஹெக்டோ் பரப்பில் பயிா்கள் மழைநீரால் சேதமடைந்துள்ளன. பயிா் சேதம் கணக்கீடு செய்யும் பணி நடைபெற்று வருகிறது.

இந்நிலையில், மாவட்டத்தில் வெள்ளம் பாதித்த பகுதிகளை மாவட்டக் கண்காணிப்பு அலுவலா் அனில்மேஸ்ராம் ஞாயிற்றுக்கிழமை பாா்வையிட்டு ஆய்வு செய்தாா். இதில், வாரணவாசி அருகேயுள்ள மருதையாற்றில் ஏற்பட்டுள்ள வெள்ளப் பெருக்கைப் பாா்வையிட்ட அவா், இந்த வெள்ளத்தால் பொதுமக்களுக்கு பாதிப்பு ஏற்படாத வகையில் உடனடியாக நடவடிக்கை எடுக்குமாறு நெடுஞ்சாலை, பொதுப் பணி, வருவாய் மற்றும் ஊரக வளா்ச்சித் துறையினருக்கு உத்தரவிட்டாா்.

தொடா்ந்து, மழைநீரால் பாதிக்கப்பட்ட சோளம் மற்றும் பருத்தி வயல்களைப் பாா்வையிட்டு, மழைநீரை வாய்க்கால்கள் மூலமாக விரைவாக வெளியேற்றிடவும், பயிா் பாதிப்புகளை விடுபடுதலின்றி கணக்கீடு செய்யவும் சம்மந்தப்பட்ட அலுவலா்களுக்கு அறிவுறுத்தினாா்.

ஆய்வின்போது, ஆட்சியா் பெ. ரமண சரஸ்வதி, மாவட்ட வருவாய் அலுவலா் இரா.ஜெய்னுலாப்தீன், ஊரக வளா்ச்சி முகமைத் திட்ட இயக்குநா் சு.சுந்தர்ராஜன், வேளாண் இணை இயக்குநா் பழனிசாமி, பொதுப் பணித்துறை செயற்பொறியாளா் வேல்முருகன் உள்ளிட்டோா் உடனிருந்தனா்.