தூத்துக்குடியைச் சோ்ந்த இளைஞரிடம் ரயில்வேயில் வேலை வாங்கித் தருவதாக ரூ.30 லட்சம் மோசடியில் ஈடுட்டதாக 2 பேரை போலீஸாா் புதன்கிழமை கைது செய்தனா்.

தூத்துக்குடி ராஜீவ் நகரைச் சோ்ந்த சுப்பையா மகன் முத்துகிருஷ்ணன் (34). இவா் மற்றும் இவரது சகோதரா் ஆகியோரிடம், மாப்பிள்ளையூரணியைச் சோ்ந்த இசக்கிமுத்து மகன் மாரியப்பன் (65), ராமநாதபுரம் மாவட்டம், சாயல்குடி கீழமுந்தல் பகுதியைச் சோ்ந்த சந்திரன் மகன் ராஜேஸ்வரன் (28) மற்றும் சிலா், ரயில்வேயில் வேலை வாங்கித் தருவதாக கூறினராம்.

மேலும், வேலை வாங்கித் தருவதற்கு, அவா்கள் பணம் கேட்டனராம். இதை நம்பிய முத்துகிருஷ்ணன், கடந்த 1.2.2022 முதல் 31.12.2022 வரை பல தவணைகளில் மேற்படி மாரியப்பன், ராஜேஸ்வரன் ஆகியோரின் வங்கி கணக்குக்கு ரூ. 30 லட்சம் அனுப்பினாராம். பணத்தை பெற்று கொண்ட அவா்கள், முத்துகிருஷ்ணன் மற்றும் அவரது சகோதரரை மேற்கு வங்கம் ஹவுராவுக்கு அழைத்துச் சென்று, மெடிக்கல் செக்அப் மற்றும் போலி சான்றிதழ் வாங்கி கொடுத்தும் ரயில்வே பணிக்கு பயிற்சி என கூறி கொல்கத்தா, தில்லி என அலைக்கழித்தனராம்.

தான் ஏமாற்றப்பட்டதையறிந்த முத்துகிருஷ்ணன், இதுகுறித்து தூத்துக்குடி மாவட்ட காவல் கண்காணிப்பாளா் எல். பாலாஜி சரவணனிடம் புகாா் அளித்தாா்.

இந்த புகாா் மீது நடவடிக்கை எடுக்க மாவட்ட குற்றப்பிரிவு காவல் துணைக் கண்காணிப்பாளா் ஜெயராமுக்கு, மாவட்ட காவல் கண்காணிப்பாளா் உத்தரவிட்டாா்.

அதன்பேரில், மாவட்ட குற்றப்பிரிவு காவல் ஆய்வாளா் அந்தோணியம்மாள் தலைமையிலான போலீஸாா் இந்த வழக்கு குறித்து விசாரணை மேற்கொண்டனா்.

இதையடுத்து, பண மோசடியில் ஈடுபட்டதாக மாரியப்பன், ராஜேஸ்வரன் ஆகிய இருவரையும் போலீஸாா் கைது செய்து விசாரித்தனா். அவா்களிடம் போலீஸாா் நடத்திய முதற்கட்ட விசாரணையில், இவா்கள் இருவரும், இது போன்று பலரிடம் வேலை வாங்கித் தருவதாக சுமாா் ரூ.1.28 கோடி வரை மோசடியில் ஈடுபட்டதும் தெரியவந்தது.

மேலும், இது குறித்து போலீஸாா் விசாரித்து வருகின்றனா்.