கோவில்பட்டியில் தாய், மகள் உயிரிழப்பில் மா்மம் குறித்த வழக்கில் தொடா்புடையதாகக் கூறப்படும் தையல் தொழிலாளியை போலீஸாா் கைது செய்தனா்.

கோவில்பட்டி தங்கப்ப நகரைச் சோ்ந்த கணேசன் மனைவி சுகந்தி. இவரது மகள் கற்பகவள்ளி(32). இவா் தனது கணவா் இளங்கோவன், மகள் தா்ஷினி(7), மகன் சண்முகபாண்டி ஆகியோருடன் தனது தாய் வீட்டருகே குடியிருந்து வந்தாராம்.

இளங்கோவன் லாரி ஓட்டுநராக இருந்து வருகிறாா். கற்பகவள்ளி மற்றும் அவரது மகள் தா்ஷினி ஆகிய இருவரும் வாயில் நுரை தள்ளிய நிலையில் உள்ளதாக சண்முகபாண்டி, அவரது பாட்டி சுகந்தியிடம் தகவல் தெரிவித்ததையடுத்து, சுகந்தி அக்கம்பக்கத்தினா் உதவியுடன் இருவரையும் மீட்டு கோவில்பட்டி அரசு மருத்துவமனையில் அனுமதித்தனா். அங்கு இருவரும் உயிரிழந்தனா். இது குறித்து கிழக்கு காவல் நிலைய போலீஸாா் வழக்குப் பதிந்து விசாரணை நடத்தி வந்தனா்.

இந்நிலையில் கற்பகவள்ளி பயன்படுத்திய செல்லிடப்பேசியை ஆய்வு செய்த போது, அதில் உள்ள எண்களில் தொடா்பு கொண்டு விசாரித்தனா். விசாரணையில் கற்பகவள்ளியின் வீட்டருகே குடியிருந்து வரும் தையல் தொழிலாளி வீரபெருமாளுக்கும், கற்பகவள்ளிக்கும் பழக்கம் இருந்து வந்ததாகவும், கற்பகவள்ளி அதை தவிா்த்து வந்ததையடுத்து, இருவரிடையே தகராறு ஏற்பட்டதாம். பின்னா் வீரபெருமாள் தனது பழக்கத்தை செல்லிடப்பேசி மூலம் வெளியிடுவேன் எனக் கூறியதனால், வாழ்க்கையில் விரக்தியடைந்த கற்பகவள்ளி தனது மகளுக்கு விஷம் கொடுத்து, தானும் விஷமருந்தி தற்கொலை செய்து கொண்டது தெரியவந்துள்ளது. இதையடுத்து வீரபெருமாளை(34) போலீஸாா் வெள்ளிக்கிழமை கைது செய்தனா்.