தூத்துக்குடி மாவட்டத்தில் மழையால் சேதமடைந்த பயிா்களுக்கு உரிய இழப்பீடு, காப்பீடு பெற்றுத் தரப்படும் என ஆட்சியா் கி. செந்தில்ராஜ் தெரிவித்தாா்.

தூத்துக்குடி மாவட்டத்தில் உளுந்து, பாசி, கம்பு, மக்காச்சோளம், சோளம், வெங்காயம், மிளகாய், சூரியகாந்தி, பருத்தி, எள், குதிரைவாலி, கொத்தமல்லி உள்ளிட்ட பயிா்கள் பயிரிடப்பட்டிருந்தன. வடகிழக்கு பருவ மழை தாமதமாக பெய்ததால் முளைப்பு தன்மை இல்லாமல் போன நிலங்களில் பயிா்களை அழித்துவிட்டு விவசாயிகள் 2-ஆவது முறையாக விதைத்தனா்.

விளாத்திகுளம், எட்டயபுரம், புதூா், நாகலாபுரம், சூரன்குடி உள்ளிட்ட பகுதிகளில் வெங்காயம், உளுந்து, பாசி, மக்காச்சோளம், சோளம் ஆகியவை அறுவடை செய்யும் பருவத்தில் இருந்தன. இந்நிலையில் தொடா்ந்து பெய்த கனமழையால் இந்த பயிா்கள் நீரில் மூழ்கி சேதமடைந்தன. இதனால் விவசாயிகளுக்கு பெரும் இழப்பு ஏற்பட்டுள்ளது.

இதற்கிடையே, விளாத்திகுளம், எட்டயபுரம் வட்டத்தில் படா்ந்தபுளி, கழுகாசலபுரம், கமலாபுரம், முத்துசாமிபுரம் மற்றும் சிவலாா்பட்டி கிராமங்களில் மழை வெள்ளத்தால் பாதிக்கப்பட்ட பயிா்களை ஞாயிற்றுக்கிழமை மாவட்ட ஆட்சியா் கி. செந்தில்ராஜ், பாா்வையிட்டு ஆய்வு செய்தாா். மேலும் விவசாயிகளிடம் பாதிப்பு குறித்து கேட்டறிந்தாா். விவசாயிகள் சேதமடைந்த பயிா்களுக்கு இழப்பீடு வழங்க வேண்டும் என ஆட்சியரிடம் வலியுறுத்தினா்.

பின்னா் ஆட்சியா் கூறியது: அறுவடை செய்யும் பருவத்தில் கனமழை காரணமாக பயிா்கள் சேதமடைந்துள்ளன. தூத்துக்குடி மாவட்டத்தில் சுமாா் 60 ஆயிரம் ஹெக்டேரில் உளுந்து, 40 ஆயிரம் ஹெக்டேரில் மக்காச்சோளம், 20 ஆயிரம் ஹெக்டேரில் பாசி பயறு வகைகள், கம்பு, பருத்தி, வெங்காயம், மிளகாய், மல்லி உள்ளிட்டவை பயிரிடப்பட்டுள்ளன.

பயிா்கள் சேதம் குறித்து வருவாய்த் துறை, வேளாண் துறை, புள்ளியியல் துறை அதிகாரிகள் கணக்கெடுத்து வருகின்றனா்.

சேதம் விவரங்களை அரசின் கவனத்துக்கு கொண்டு சென்று, உரிய இழப்பீடு மற்றும் காப்பீடு பெற்றுத்தர நடவடிக்கை எடுக்கப்படும் என்றாா் அவா்.

கோவில்பட்டி வட்டம் இடைசெவல் கிராமத்தில் பாதிக்கப்பட்ட விளை நிலங்களை ஆட்சியா் பாா்வையிட்டாா். விவசாயிகளிடம் குறைகளை கேட்டறிந்தாா்.

பின்னா், செய்தியாளா்களிடம் அவா் கூறுகையில், தூத்துக்குடி மாவட்டத்தில் கோவில்பட்டி, கயத்தாறு, எட்டயபுரம், விளாத்திகுளம் வட்டங்கள், புதூா் ஊராட்சி ஒன்றியப் பகுதிகளில் சேதமடைந்த பயிா்கள் குறித்து கணக்கெடுக்கும் பணி நடைபெற்று வருகிறது. பாதிக்கப்பட்ட விவசாயிகளுக்கு இழப்பீடு வழங்கப்படும் எனத் தெரிவித்தாா்.

ஆய்வின்போது, கோட்டாட்சியா் விஜயா, வட்டாட்சியா்கள் ரகுபதி, ஐயப்பன், மணிகண்டன், வேளாண் இணை இயக்குநா் முகைதீன், ஆட்சியரின் நோ்முக உதவியாளா் பாலசுப்பிரமணியன், வேளாண் உதவி இயக்குநா்கள், அதிகாரிகள் உடனிருந்தனா்.