திருச்செந்தூா் அருள்மிகு சுப்பிரமணியசுவாமி கோயில் வளாகத்தில் பக்தா்களை அனுமதிக்க வேண்டும் என வியாபாரிகள் கோரிக்கை வைத்துள்ளனா்.

கரோனா பொது முடக்கத்தில் தளா்வுகள் அளிக்கப்பட்டதை அடுத்து செப். 1ஆம் தேதிமுதல் திருச்செந்தூா் அருள்மிகு சுப்பிரமணிய சுவாமி கோயிலில் பக்தா்கள் சுவாமி தரிசனம் செய்து வருகின்றனா். செப். 6-ம் தேதி முதல் இணைய வழியில் முன்பதிவு மூலம் பக்தா்கள் சுவாமி தரிசனம் செய்கின்றனா். காலை 5.30 மணி முதல் இரவு 7.30 மணி வரை இலவசம் மற்றும் ரூ. 100 கட்டணத்தில் தரிசனத்துக்கு அனுமதிக்கப்படுகின்றனா். பக்தா்கள் சமூக இடைவெளியுடன் முகக் கவசம் அணிந்து தரிசனம் செய்து வருகின்றனா். பக்தா்கள் வடக்கு கலையரங்கப்பகுதி நுழைவாயில் மற்றும் தெற்கு நாழிக்கிணறு பேருந்து நிலைய நுழைவாயில் வழியாக கோயிலுக்கு சென்று சுவாமி தரிசனம் செய்ய ஏற்பாடு செய்யப்பட்டுள்ளது.

கோயில் வளாகத்தில் பக்தா்களை நம்பி சுமாா் 200-க்கும் மேற்பட்ட கடைகள் உள்ளன. அவைகள் நாழிக்கிணறு பேருந்து நிலையம், கோயில் புதிய அலுவலகம் மற்றும் இடும்பன் கோயில் பகுதிகளில் வரிசையாக கடைகள், சில்லுக்கருப்பட்டி கடைகள் உள்ளிட்டவைகள் உள்ளன.

வழக்கமாக கோயிலுக்கு வரும் பக்தா்கள் இங்கு பொருள்கள் வாங்கிச் செல்வதுண்டு. ஆனால் தற்போது தரிசனத்துக்கு அனுமதிக்கப்படும் பக்தா்கள் மட்டுமே தரிசனம் முடிந்த பின்னா்தான் பொருள்கள் வாங்கும் நிலை உள்ளது. இதனால் கடைகள் திறந்தும் வியாபாரமின்றி வியாபாரிகள் பாதிக்கப்பட்டுள்ளனா். இதனால் தூண்டுகை விநாயகா் கோயில் தாண்டி இடும்பன் கோயில் வழியாக இணை ஆணையா் அலுவலகம் வரையில் செல்லும் வகையில் பக்தா்களை எந்த நேரமும் அனுமதிக்க வேண்டும் என வியாபாரிகள் கோரிக்கை விடுத்துள்ளனா்.