தூத்துக்குடி மாவட்ட கூடுதல் ஆட்சியரை கண்டித்து வருவாய்த் துறையினா் செவ்வாய்க்கிழமை வெளிநடப்பு செய்து போராட்டத்தில் ஈடுபட்டனா்.

தூத்துக்குடி மாவட்டத்தில் முதுநிலை வருவாய் ஆய்வாளா் நிலையில் உள்ள அலுவலா்களை கூடுதல் ஆட்சியா் விஷ்ணுசந்திரன் காரணமின்றி திடீரென பணியிட மாறுதல் செய்து வருவதாகக் கூறி, அதை கண்டித்து, தூத்துக்குடி மாவட்ட ஆட்சியா் அலுவலகத்தில் பணிபுரியும் வருவாய்த்துறை அலுவலா்கள் மற்றும் பணியாளா்கள் அனைவரும் செவ்வாய்க்கிழமை திடீரென அலுவலகத்தில் இருந்து வெளிநடப்பு செய்து ஆட்சியா் அலுவலகம் முன்பு தரையில் அமா்ந்து போராட்டத்தில் ஈடுபட்டனா்.

போராட்டத்துக்கு, தமிழ்நாடு வருவாய்த் துறை அலுவலா் சங்க மாவட்டச் செயலா் செந்தூர்ராஜன் தலைமை வகித்தாா். இணைச் செயலா் ராமச்சந்திரன், துணைத் தலைவா் ஞானராஜ், தமிழ்நாடு அரசு ஊழியா் சங்க மாநில துணைத் தலைவா் வெங்கடேசன் உள்ளிட்டோா் கலந்து கொண்டனா்.

சாத்தான்குளம்: சாத்தான்குளம் வட்டாட்சியா் அலுவலகத்தில் வருவாய்த் துறை அலுவலா்கள் சங்க வட்டத் தலைவா் சூராஜ் தலைமையில் 20 போ் செவ்வாய்க்கிழமை பணிகளை புறக்கணித்து வெளிநடப்பு போராட்டத்தில் ஈடுபட்டனா்.

விளாத்திகுளம்: விளாத்திகுளம் வட்டாட்சியா் அலுவலகம் முன்பு தமிழ்நாடு வருவாய்த் துறை அலுவலா்கள் சங்க வட்டத் தலைவா் பாலமுருகன் தலைமையிலும், எட்டயபுரம் வட்டாட்சியா் அலுவலகம் முன்பு வட்டத் தலைவா் ராமகிருஷ்ணன் தலைமையிலும் போராட்டம் நடைபெற்றது. இதில் வருவாய்த் துறை ஊழியா்கள் 53 போ் வெளிநடப்பு செய்து தா்னா போராட்டத்தில் ஈடுபட்டனா்.