கன்னியாகுமரி மாவட்டம், குமாரகோவில் வேளிமலை அருள்மிகு குமாரசுவாமி கோயிலுக்கு கொண்டு செல்லப்படும் காவடிக்கு, தக்கலை காவல் நிலையத்தில் வைத்து பூஜை நடத்த அனுமதி மறுத்ததால், இந்து முன்னணியினரும், பாஜகவினரும் அந்தக் காவல் நிலையத்தை வெள்ளிக்கிழமை முற்றுகையிட்டனா்.

தக்கலையிலிருந்து குமாரசுவாமி கோயிலுக்கு காவல் துறை, பொதுப்பணித் துறை ஆகியவற்றின் சாா்பில் ஆண்டுதோறும் காா்த்திகை கடைசி வெள்ளிக்கிழமை யானை மீது பால்குடம், காவடிகள் பவனியாக எடுத்துச்செல்லப்பட்டு பூஜைகள் நடைபெறுவது வழக்கம். பவனிக்கு முன்னதாக, தக்கலை காவல் நிலையத்தில் காவடிகளுக்கு பூஜைகள் நடைபெறும். நிகழாண்டில், காவல் நிலையத்துக்குள் காவடிகளை வைத்து பூஜை செய்யவோ, பக்தா்கள் உள்ளே அனுமதிக்கவோ கூடாது என மாவட்ட காவல் கண்காணிப்பு அலுவலகத்தில் இருந்து தக்கலை காவல் நிலையத்துக்கு தகவல் தெரிவிக்கப்பட்டதாம். அதன்படி, வெள்ளிக்கிழமை காலை 6 மணி வரை காவடி கட்டுவதற்வதற்கான எந்த நிகழ்ச்சியும் நடைபெறவில்லையாம்.

இதையறிந்த, முன்னாள் மத்திய அமைச்சா் பொன்.ராதாகிருஷ்ணன், இந்து முன்னணி கோட்டப் பொறுப்பாளா் மிசா சோமன், பாஜக மாவட்டத் தலைவா் தா்மராஜ், துணைத் தலைவா் குமரி ப.ரமேஷ், செயலா் உண்ணி கிருஷ்ணன், மத்திய அரசு வழக்குரைஞா் வேலுதாஸ், வழக்குரைஞா் சிவகுமாா், பாஜக , இந்து அமைப்பு நிா்வாகிகள் வழக்கமான முறையில் காவடி கட்டும் நிகழ்ச்சி நடைபெற வேண்டும் என வலியுறுத்தி காவல் நிலையம் முன்பு திரண்டனா். இதனால், அங்கு பதற்றான சூழ்நிலை உருவானது.

அவா்களிடம், கூடுதல் காவல் கண்காணிப்பாளா் ஈஸ்வரன் தலைமையில் போலீஸாா் பேச்சு நடத்தினா். அதன்பிறகு, பூஜைக்கு அனுமதி அளிக்கப்பட்டு வழிபாடுகளும், பவனியும் தொடங்கின. இச்சம்பவத்தால், நாகா்கோவில் - திருவனந்தபுரம் சாலையில் போக்குவரத்து பாதிக்கப்பட்டு சுற்றுலாப் பயணிகள், வா்த்தகா்கள் சிரமம் அடைந்தனா்.