வருடாந்திர பராமரிப்புப் பணிகளுக்காக கூடங்குளம் அணுமின் நிலையத்தில் முதலாவது அணு உலையில் மின் உற்பத்தி செவ்வாய்க்கிழமை நிறுத்தப்பட்டது.

திருநெல்வேலி மாவட்டம், கூடங்குளத்தில் ரஷிய நாட்டு தொழில்நுட்பத்துடன் ஆயிரம் மெகாவாட் திறன் கொண்ட இரண்டு அணு உலைகள் செயல்பட்டு வருகிறது. இதில், 2ஆவது அணு உலையில் கடந்த 19ஆம் தேதி ஏற்பட்ட தொழில்நுட்பக் கோளாறால் மின் உற்பத்தி நிறுத்தப்பட்டது. பின்னா் தொழில்நுட்பக் கோளாறு 20ஆம் தேதி சரி செய்யப்பட்டு மீண்டும் 2ஆவது அணு உலையில் மின் உற்பத்தி தொடங்கியது.

இந்நிலையில் முதலாவது அணு உலையில் வருடாந்திர பராமரிப்புப் பணிகள் செய்வதற்காக மின் உற்பத்தி செவ்வாய்க்கிழமை (ஜூன் 22) நிறுத்தப்பட்டுள்ளது. பராமரிப்புப் பணிகள் முடிவடைந்த பின்னா் முதலாவது அணு உலையில் மின் உற்பத்தி தொடங்கப்படும் என அணுமின் நிலைய வட்டாரத்தில் தெரிவித்தனா்.