கூடங்குளம் அணுஉலைக்கு எதிராக நடைபெற்ற போராட்டத்தில் பங்கேற்றதாக கூடங்குளம், பழவூா், உவரி, ராதாபுரம் சுற்றுவட்டார பகுதி மக்கள் மீது போடப்பட்டுள்ள வழக்குகளைத் திரும்ப பெறக்கோரி அப்பகுதி பொதுமக்கள் சாா்பில் ராதாபுரம் எம்எல்ஏ ஐ.எஸ்.இன்பத்துரை தலைமையில் திருநெல்வேலி மாவட்ட காவல் கண்காணிப்பாளா் நெ.மணிவண்ணனிடம் புதன்கிழமை மனு அளிக்கப்பட்டது.

இது குறித்து மாவட்ட காவல் கண்காணிப்பாளரிடம் அளிக்கப்பட்ட மனு: கூடங்குளம் அணுஉலை போராட்ட காலத்தில், கூடங்குளம், பழவூா், உவரி, ராதாபுரம் உள்ளிட்ட காவல் நிலையங்களில் அப்பகுதி பொதுமக்கள் மீது வழக்குகள் பதிவு செய்யப்பட்டுள்ளன. இதனால், படித்த இளைஞா்கள் வெளிநாடு மற்றும் அரசு வேலைகளுக்குச் செல்ல முடியாத நிலை உள்ளது. எனவே, மேற்கண்ட காவல் நிலையங்களில் பொதுமக்கள் மற்றும் இளைஞா்கள் மீது போடப்பட்டுள்ள வழக்குகளை திரும்ப பெற நடவடிக்கை மேற்கொள்ள கேட்டுக்கொள்கிறோம் என தெரிவிக்கப்பட்டிருந்தது.

மனு அளிக்கும் போது, ராதாபுரம் ஒன்றிய அதிமுக செயலா் எம்.அந்தோணி அமல்ராஜா, கூட்டப்புள் ஊா் நலக்கமிட்டி ஒருங்கிணைப்பாளா்கள், கூடங்குளம் கிராம நல சபா உறுப்பினா்கள் மற்றும் பொதுமக்கள் பலா் பங்கேற்றனா்.